Rådmann i Selje Reidar Sandviknes har søkt om å få slutte som rådmann i Selje kommune.
Nyleg handsama kommunestyret søknaden, og sa ja til den. Det betyr at kommunen no skal jakte på ny rådmann i Selje.
Reidar Sandviknes har vore rådmann i Selje dei siste 17 åra. No har partane blitt samde om at han sluttar i stillinga 31. juli i år.
– Det har ikkje vore noko dramatikk rundt dette. Eg har vurdert det ei god stund, seier Reidar Sandviknes til Fjordenes Tidende.
63-åringen legg til at han no har kome opp i ein alder som tilseier at han burde tenke i andre baner og nemnde at han tenkte på å slutte overfor ordførar Ottar Nygård ved nyttår.
Det er ikkje mange rådmenn som held ut så lenge, smiler han.
Sandviknes går inn i ei retrettstilling frå 1. august. Dette betyr å han trekkje seg tilbake frå ei meir krevjande stilling.
Hard belastning
Sandviknes legg ikkje skjul at det å vere rådmann er ei krevjande stilling.
– Det har vore ei ganske hard belastning gjennom mange år. Så dette er ein sum av belastning, alder og at eg ønsker å prioritere privatlivet meir enn eg har klart til no. Derfor søkte eg retrettstilling, seier Sandviknes.
Over i pensjon
Rådmannen har i vår vore sjukmeld, og er framleis delvis sjukmeldt.
Han forklarar at han snart vil gå over i pensjon.
– Frå nyttår går eg ned til 60 prosent stilling, seier han.
Selje kommune slit med økonomiske utfordringar, og rådmannen blei i kommunestyremøte i mars møtt med eit mistillitsforslag frå Framstegspartiet.
– Har det vore med å påverke avgjerda om å slutte?
– Det har ikkje vore i tankane mine. Eg har eigentleg forholdt meg til eit kommunestyre som har hatt ei anna meining, seier Sandviknes.
Les heile saka i papirutgåva fredag 27. juni.