Russen ved Måløy vidaregåande skule sette rekord ved å samle inn 120.000 kroner til «Krafttak mot kreft».
– Det har aldri vore samla inn så mykje pengar under «Krafttak mot kreft» her. Vi er nesten litt i sjokk over at vi har klart å samle inn så mykje pengar, fortel Henriette Barmen, som er aksjonsleiar for russen ved Måløy vidaregåande skule.
Aksjonaleiaren er rørt over innsatsen til medelevar og alle som har bidrege til aksjonen.
– All russen har gjort ein veldig god jobb. Det vart ein ganske spesiell tur i banken i dag og det var nesten litt skummelt å gje frå seg så mykje pengar, seier Barmen.
Blant dei mest attraktive i fylket
– Målet vårt var jo å slå fjoråret, men også sjølvsagt å samle inn så mykje pengar som mogleg og det føler eg vi har klart, seier ein stolt aksjonsleiar.
Pengane frå innsamlingsaksjonen «Krafttak mot kreft», skal gå til personar som ikkje blir friske frå kreftdiagnosen sin og deira pårørande.
– Mange var klar over at vi skulle kome og venta på oss. Eg møtte berre smilande folk som gjerne ville bidra på mi rute. Kreft er nok eit tema som fleire kan relatere seg til. Vi merka det på russen også at dette er ein aksjon som engasjerer, fortel Barmen.
Russen gjekk frå hus til hus mellom klokka 17 og 20. Trass i at dei hadde planlagt aksjonen godt, rakk dei ikkje over alle.
– Vi gjorde så godt vi kunne, men vi måtte ha ein frist for innlevering av bøssene, forklarar Barmen.