Det blir musikk, mat og mykje moro under Kalvåg Kystfestival neste helg.
Det kjem til å gå slag i slag med program på sjø og land i Kalvåg frå torsdag 31. juli når Ausekarane kjem med ferja Showboat på Knutholmen. Dagen etter blir det offisiell opning ved Kalvåg Kystlag ved Amtskaia.
Fleire tusen til kystfestival
– Det har vore bra med folk på opninga, kanskje 200–300 menneske, seier Arvid Langeland som er festivalleiar i Kalvåg Kystlag.
På opninga kjem Henry Nyttingnes, som er gamal kalvågar, og han skal fortelje fleire historier på rorbukveld i Frøyenbua. Kalvåg Skulemusikk med Monica Frøyen stiller opp og det gjer også Frøysjørock og ei dansegruppe.
Utstilling
Kystlaget har plass til utstillingar på land og til gamle båtar ved flytebryggene på Amtskaia. Det blir mange standar med sal av mat og anna, og sjølve skal kystlaget selje heimelaga fiskekaker, fiskesuppe, tørrsild og meir til. På ei utstilling blir det vist to gamle båtmotorar, kystlaget sin Rapp EC og Thomas Lawerman sin Kjapp
– Vi håper at folk skal kome og prate, og gå i gatene, seier Arvid Langeland.
Internasjonale artistar
Leiar Jan André Bolset i Aktiv Kalvåg, fortel at konsertprogrammet på skuleplassen i år er blitt internasjonalt.
The Waterboys (UK) kjem rett frå Japan, og dei andre som deltek er Dance With a Stranger, Ole Ivars, Claudia Scott og Kokken Tor, eit rockeband med gode, gamle låtar. På skuleplassen blir det lokale band på dagtid laurdag.
Det er plass til 2.000 menneske på skuleplassen, og der står Knutholmen for festivalmat og drikke. I år blir det tilbod om båttransport heim etter konsertane.
– Det har vi prøvd å få til i mange år, og dette er første gang. Det vert ein ekspressbåt frå Norled som køyrer til Florø, Måløy og Selje, seier Jan André Bolset.
Nytt i år er også tilbod om campingplass for telt på Robertmarka, og frå før han ein plass for bubilar og campingvogner på Kalvøya.
– Det blir program heile tida, og vi har mange fine aktivitetar om dagane. På sjøen kjem Våt Moro med mellom anna tube på sjøen, seier Jan André Bolset. Andre ting som skjer er havrafting, olabil, turar med båtane til kystlaget, tivoli og servering av god mat ved Knutholmen.
Heile saka stod i papir og e-avisa måndag 21. juli.