– Det er vi godt fornøgd med, seier driftskoordinator Sigve Slagnes ved Frøy Vest AS i Evja i Vågsøy, som fortel at dei også blei kåra til gasellebedrift fire gongar før fusjonen i 2015 då selskapet heitte West Dykkerservice.

– Men dette er første gongen vi har blitt gasellevinnar.

Fyller kriteria

Med 677 prosents vekst har Frøy Vest hatt den største omsetningsveksten av alle gasellebedriftene i fylket, 64 i talet. For å kvalifisere som gaselle i det heile tatt må ei bedrift ha:

  • levert godkjende rekneskap

  • minst dobla omsetnaden over fire år

  • ei omsetning på over ein million kroner første år

  • positivt samla driftsresultat

  • unngått negativ vekst

  • vore aksjeselskap

Det er Dagens Næringsliv som kårar dei norske gasellane i samarbeid med Bisnode Credit AS.

Og i Dagens Næringsliv si oversikt over gasellane i Sogn og Fjordane troner altså Frøy Vest AS på topp, med ei omsetning på 137,6 millionar kroner i 2015 og ein vekst på 677 prosent dei siste fire åra.

90 prosent oppdrett

Slagnes trur nok strukturendringane som blei gjort i selskapet for snart to år sidan, då dåverande West Dykkerservice blei kjøpt av Frøy Akvaservice og fusjonert med selskapa Sunnfjord Dykkerservice og Møre Dykkerservice, har spelt ei rolle for omsetningsveksten. Men han peiker også på ei enormt raskt veksande oppdragsmengd for oppdrettsnæringa.

Sigve Slagnes seier Frøy Vest jobbar hardt for å halde kvaliteten oppe og heile tida utvikle seg.

– Det har vore ein veldig vekst i oppdrettsnæringa som vi har fått tatt del i. Oppdrettsnæringa står nok for om lag 90 prosent av det vi driv med, seier Slagnes.

– Ser de framleis auke?

– Ja, vi gjer det. Og det kjem nok mykje av krava som no blir sett til oppdrettsnæringane med mykje avlusing og fokus på miljøet til fisken, seier Slagnes, som også fortel at dei har vore litt inne på utviklingssida når det gjeld avlusing.

Jobbar for å halde seg på topp

Lekterane med avlusingsutstyr leiger dei ut til og driftar for Marine Harvest.

– Det er fleire konkurrentar i marknaden no, og vi må gjere det vi kan for å vere på topp, seier han, og ser dette i samanheng med gasellesigeren.

– Ein får ikkje eit sånt resultat utan at ein har kundar som vel deg. Og eg håpar og trur dei vel oss fordi vi er flinke til det vi driv med.

Alltid på jakt

Frøy Vest har vakse raskt og oppkjøpet og fusjonen i 2015 førte til ei ytterlegare satsing i Vågsøy. Dei er stadig på jakt etter kompetente folk til selskapet.

– Det er kjekt med lokale folk på dei båtane som går rundt omkring her. Vi har ingen båtar med mannskapsbehov akkurat no, men vi får ein ny båt klar på forsommaren og då vil det nok bli behov for tilsette fleire til denne båten eller andre båtar.

Gasellebedrifter 2016

Vågsøy

  • Frøy Vest AS (omsetning 137,6 mill., vekst 677 %)

  • Verlo Eiendom (omsetning 3,1 mill., vekst 157 %)

  • Kontorpunkt AS (omsetning 11,3 mill., vekst 228 %)

  • Silver Horn Ii AS (omsetning 33,7 mill., vekst 126 %)

  • Maskinentreprenør Jimmy Nore & sønn AS (omsetning 17,1 mill., vekst 104 %)

  • Videonor AS (omsetning 18,1 mill., vekst 110 %)

  • Vågsøy Kran og Transport AS (omsetning 2,9 mill., vekst 106 %)

Selje

  • Lapoint Travels AS (omsetning 40,8 mill., vekst 222 %)

  • Paneda DAB AS (omsetning 16,0 mill, vekst 427 %)

  • Statthav AS (omsetning 5,0 mill., vekst 191 %)

Eid

  • Starheimsvik AS (omsetning 7,9 mill., vekst 196 %)

  • Astra Økonomi Nordfjord AS (omsetning 2,8 mill., 153 %)

  • Nordfjord Vegservice AS (omsetn 7,6 mill., vekst 110 %)