Det er fylkesordførar Åshild Kjelsnes som får æra av å opne det nye Bremangersambandet.
Det skjer 16. mai i under opningsmarkeringa i Bortnen.
Kjelsnes står for snorklyppinga saman med regionvegsjef Helge Eidsnes og bremangerordførar Karl Vidar Førde, melder Sogn og Fjordane fylkeskommune på sine nettsider.
Bortnen er midt i det nye veganlegget, og lokale kulturkrefter vil bidra sterkt i markeringa. Det vert sett opp fleire bussar for å få folk til og frå Bortnen for å sikre framkommelegheit under seremonien.
Siste innspurt– Når vi får opna Bortnetunnelen, vil folk verkeleg få ta ut nytten av Bremangersambandet, seier prosjektleiar Susanne Svardal i Statens vegvesen.
Mellom Leirgulen og Bortnen går vegbygginga no føre seg for fullt, og Svardal har fått lovnader frå entreprenørane om at vegen skal vere asfaltert og i fullt køyrbar stand til opninga. Men ein del arbeid med opprydding og pynting av vegskuldrar vil stå att til etter 17.-maihelga.
Tunnelane på strekninga er ferdige og sikkerheitstesta, og i Sørdalen står det att litt finpuss, skilting og siste asfaltlaget før vegen vert opna.
Ordføraren gler seg – Vi gler oss veldig til vegopninga 16. mai, og i tillegg til opningsseremonien vil vi ha ein eigen folkefest i kommunen for å feire nyevegen, seier ordførar Karl Vidar Førde i Bremanger.
Bremangersambandet er siste byggesteg på sambandet der Bremangerlandet fekk fastlandsforbindelse i 2002. Vegen kortar ned strekninga mellom Bremangerlandet og kommunesenteret Svelgen med 40 km (ca. 45 min), og fører til at ferja mellom Kjelkenes og Smørhamn kan leggjast ned.