Dei seks borna som er etterlatne til den polske kvinna som mista livet i dødsulukka på Rv 15 ved Bryggja i påska 2013 gruar seg til rettssaka.
– Men dei ser fram til å bli ferdige med den.
Det seier Per Kjetil Stautland som er bistandsadvokat for dei seks barna
No er det bestemt at saka skal opp i Fjordane Tingrett i veke 26. Den startar i Førde 23. juni, og det er sett av ei veke til saka.
Stautland seier han vil i rettssaka sette fram eit erstatningskrav på vegner av barna til den omkomne.
Stautland kan ikkje seie no akkurat kor stort kravet frå dei etterlatne vil bli, men antydar at det kan kanskje bli over 600.000 kroner.
Har det tungt
– Eitt av barna er mindreårig. Dei andre er vaksne og bur i ulike land. Spesielt med tanke på alvoret i saka, er det naturleg at det blir ei skikkeleg erstatning til dei som sit igjen, seier Stautland.
Han seier ungane har hatt det tungt og vanskeleg etter ulukka der dei mista mor si. Dei ser alle fram til at rettssaka er over, og at dei kan komme seg vidare.
Føraren av bilen som var involvert i den tragiske ulukka, der ei kvinne mista livet, er tiltalt for uaktsamt drap.
Statsadvokaten i Sogn og Fjordane og Møre og Romsdal har teke ut ein svært så alvorleg tiltale mot den danske vikarlegen i 40-åra, som kom frå nattevakt og som kolliderte front mot front med ein møtande bil på Rv 15 på Bryggja i Vågsøy skjærtorsdag i 2013.
Den kvinnelege føraren i den møtande bilen mista livet i ulukka.
Stor fart
Rekon, som driv med etterforsking av trafikkulukker og bilbrannar, har på oppdrag frå politiet gjennomgått dokumentasjonen etter dødsulukka.
Konklusjonen er at Mercedesen, som kom i retning Måløy, kan ha hatt en fart på mellom 125 og 145 kilometer i timen då den i 80-sona kom over i feil kjørefelt og trefte bilen der den polske kvinna og ein passasjer sat.
I tillegg til å ha hatt høg fart og ha kome over i feil kjørebane, så har Folkehelseinstituttet rekna ut at den mannlege føraren av Mercedesen har hatt ein promille på 0,5 som ein følgje av medikament.Mannen, som var på veg heim til Måløy frå nattevakt på Nordfjordeid, blei alvorleg skadd, men overlevde ulukka.
Føraren er tiltalt for brot på straffelova paragraf 239, som betyr uaktsamt bildrap med ei strafferamme på inntil seks år.
Han er òg tiltalt for brot på vegtrafikklova sin paragraf 31 for ikkje å ha vore aktsam, for å ha køyrd i rusa tilstand og for å ha brote fartsgrensa.