Kyrkjeverje Anne Gry Fløien jobbar med å få oversikt over skadane i Sør-Vågsøy kirke etter at nokon sette fyr på den natt til laurdag.
– På grunn av røyk og røykjelukt må vi flytte alle kyrkjelege aktivitetar i ei tid framover, anten til Nord-Vågsøy kyrkje eller Totland kyrkje, seier kyrkjeverje i Vågsøy, Anne Gry Fløien.
Det var natt til laurdag at at nokon hadde sett fyr på hovuddøra til Sør-Vågsøy kirke. Vågsøy brannvesen var raskt på staden og fekk sløkt brannen. Kva tid kyrkja kan takast i bruk igjen, er usikkert.
- Kjapp respons kan ha hindra storbrann
– Vi opnar ikkje opp kyrkja for bruk før vi veit at det er forsvarleg, seier Fløien.
Ho synest det er trist at nokon kan få seg til å gjennomføre ei slik handling.
– Heldigvis har alle dei tre kyrkjene våre gode varslingssystem, seier ho.
Mange har teke kontakt med kyrkjekontoret måndag.
– Folk synest dette er trist. Nokre blir sinte, og folk er meir engasjerte enn redde.
Konstituert lensmann i Vågsøy, Tor Sæther fortel at dei jobbar for fullt med etterforskinga.
– Vi ser svært alvorleg på saka. Hadde brannvesen kome seinare, er det usikkert om dei hadde klart å sløkke brannen, seier Sæther.
Politiet ønsker kontakt med mogleg vitne
Politiet bad søndag om at eit mogleg vitne, som har opphalde seg i området rundt kyrkja då brannen blei meldt cirka klokka 00.20 om natta, om å ta kontakt. Personen, ei kvinne eller ein mann har vore ikledd fargerike kle, noko rosa eller raudleg på overkroppen.
– Vi har ikkje vore i kontakt med vedkommande endå. Vi er interessert i å få snakke med personen. Og om andre har sett ein person i fargerike kle, må dei melde frå til politiet, seier han.
Politiet har gjennomført avhøyr av vitne, følgjer opp dei trådane dei har, og ber om meir tips frå publikum.
Politiet ber om tips etter kyrkjebrann
– Det er viktig at folk som har observert noko fredag kveld eller natt til laurdag tek kontakt, uansett om ein tenker at det ikkje har noko med saka å gjere. Meld ifrå likevel, slik at vi får vurdere desse opplysningane. Vi ønsker også å komme i kontakt med folk som har vore ute og køyrt bil, som kanskje har kamera i bilen og elles observasjonar av bilar. Vi går breitt ut og held alle teoriar opne, seier Sæther.
Han kan ikkje hugse å ha oppleve kyrkjebrann i si karriere i politiet.