– Det er veldig positivt at ein nyttar seg av stiane og turpostane i området her, seier Tor Magne Gangsøy i Ytre Nordfjord Turlag, som har hatt totalt 10.677 besøk i Vintertrimmen.
– Det er veldig mykje folk ute og går, og dette er jo berre eit knippe av plassane vi har her i Vågsøy og Selje der folk kan registrere seg, seier Gangsøy.
Får 200.000 til tursti
– Då var det finvêret som gjorde det. Vi hadde ein fin haust i fjor, som løfta litt interessa for folk å komme seg ut. Ein vil nyte dei siste dagane før vinteren kjem. Det vi driv med her på Vestlandet er jo veldig vêravhengig, smiler Gangsøy.
Ekstra motivasjon
I 2014, sist toppår, var det kring 150 påmelde til Vintertrimmen. Til saman var det registrert 10.533 besøk.
– Eg synest det står meir respekt av dei tala, seier Gangsøy.
Denne sesongen har YNT seld 380 vintertrimkort, langt fleire enn tidlegare.
– Eg trur ikkje det berre er finvêret. Folk får nok ein annan motivasjon med eit klippekort i handa.
Større interesse
Han merkar også meir interesse for turar i fjellet.
– Ein får mykje meir spørsmål om stimerking og nye plassar å gå enn det har vore før.
Og han vil gjerne ha endå fleire med på fjellet.
– Vi vil nå ut til så mange som mogleg, og gjerne folk som ikkje likar å gå aleine. Då kan ein vere med på plassar som Hornelen til dømes, fjell du har lyst å gå på, men som du kanskje ikkje går aleine.
Nytt denne sesongen er at Kvamefjellet er med.
– YNT dekker jo Vågsøy og Selje, så derfor prøvar vi å få med toppar i Selje også, seier turleiaren.
Vintertrimmen
Består av følgjande fjell ein skal gå i perioden 1. oktober-15. mai: Kjeretoppane, Kletten, Skadebakken, Veten, Brurahornet, Gottrøysa, Børahornet, Hestetinden, Hanekammen, Sunnivahornet, Skongenes fyr, Rystestøylen, Salen og Kvamefjellet.