Jau, Høgre varslar nye kommunesamanslåingar og norsk EU-medlemskap
Senterpartiet vil styrke det lokale og nasjonale sjølvstyre og sikre tenester nær folk. Her går ei av dei mest sentrale skiljelinjer i norsk politikk i dag.
I eit svarinnlegg til meg og Senterpartiet prøvar Høgre sin stortingsrepresentant Olve Grotle å bortforklare den merkbart store forskjellen det er mellom dei sakene Erna Solberg og Høgre løftar fram som viktige på Stortinget og i storbyane, og dei sakene folk lokalt i våre område er opptatt av.
«Kvar har du vore, Erling Sande?»
Grotle svarar ikkje på det eg spurte om, nemleg kvifor Høgre vil ta vekk viktige nye tiltak frå Senterpartiet og Arbeidarpartiet langs kysten som gratisferjer og reduserte ferjeprisar, auka pendlarfrådrag, bygdevekstmidlar. Det hjelper neppe å spørje ein gong til.
Men når Olve Grotle seier at det er feil at Høgre vil trappe opp arbeidet for å få sendt ny EU-søknad og ikkje vil presse gjennom fleire kommunesamanslåingar, då må ein spørje seg om han i heile tatt var på Høgre sitt landsmøte eller har høyrt debattane i Stortinget dei siste månadane. I vårt opne samfunn kan heldigvis ein kvar gå tilbake og sjå kva formuleringar Høgre har brukt der.
I ei uttale vedtatt på Høgre sitt landsmøte 2022 heiter det mellom anna:
«norsk EU medlemskap nå er blitt viktigere enn noen gang», og at partiet «vil innta en ledende rolle i en ny norsk EU-debatt»
Når det gjeld nye kommunesamanslåingar så er også landsmøtet til Høgre klokkeklart. Her er vedtaket:
«For å gjennomføre dette er det viktig å videreføre kommunereformen for å få større og mer robuste kommuner med tilgang på god fagkompetanse.»
«Kven er du mest samd med, Olve Grotle?»
I februar var høgre sin kommunalpolitiske talsmann Mudassar Kapur ute og sa at dei lokale Høgre-folkevalde blir utfordra på å ta «nabopraten» for å få til fleire samanslåingar.
Det er sjølvsagt greitt å meine dette – men Høgre må tole å bli utfordra til debatt når nokre av oss har eit anna standpunkt også utanfor Oslogryta der desse standpunkta ikkje er så populære.
For Senterpartiet går til val på det tvert motsette av Høgre i desse sakene. Vi seier ja til nasjonalt sjølvstende og nei til meir sentralisering. No er hovudoppgåva å sikre gode tenester nær folk.