I sak 23/057 på formannskapsmøte den 27.04.23 vert det foreslått at «Fjordvarme KF stoppar vidare arbeid med fjordvarmeanlegg i tettstaden Selje».
Vi var mange som gledde oss over dei moglegheitene som låg i det kommunale vedtaket om å etablere eit slikt anlegg i Selje sentrum. Det vil utan tvil kunne ha stor positiv innverknad på arbeidet med å gjenreise det tidlegare kommunesenteret Selje til eit levande og attraktivt samfunn der folk og bedrifter vil bu og virke.
Dårlegare økonomi, færre kundar og auka risiko gjer at utbygging i bygda kan bli stoppa
Derimot, vert dette vedteke, er det svært dårleg nytt for Selje-området. Samstundes som det gjev eit svært negativt signal til lokalsamfunnet, kjem det på verst tenkjelege tidspunkt med tanke på det pågåande arbeidet med å få reist nytt hotell og samlokalisert symje- og fleirbrukshall i bygda. Forslaget til vedtak gjev og grunn til å reflektere over kommuneleiinga sine ambisjonar for framtidig satsing på, og bruk av kommunale bygg i bygda.
På denne bakgrunn, vil Selje Næringsforening på det sterkaste, oppmode om at Stad formannskap går imot framlegget til vedtak i denne saka slik at også Selje-samfunnet for framtid kan dra nytte av fordelane av at eit slikt anlegg vert sett i drift også i tråd med tidlegare kommunale vedtak.»