– Ho jobbar ikkje berre for si eige gruppe, men alle i Skavøypoll turn. Ho passar på alt og alle og sørger for at gymnastar, trenarar og styret har det bra. Ho er absolutt ein av dei som tar på seg meir ansvar enn ho hadde trengt, seier Ann-Jali.
Ho seier vidare at Camilla prioriterer turnmiljøet høgt.
– Ein treng sjølvsagt dei som kan å sikre, men vi treng også nokon som vågar å leie og vågar å ta tak. Camilla er ei slik ei, seier Ann-Jali.
– Nei, så fantastisk. Dette var veldig kjekt, seier Camilla når Fjordenes Tidende ringer for å fortelje at ho får ei julestjerne for alt ho gjer for Skavøypoll turn.
– Eg synest Skavøypoll turn er ein veldig fin arena for barn og ungdom. Ein arena der dei kan få drive med idretten dei likar. Og då er det veldig fint å kunne vere med å bidra til det som trenar, gjennom det administrative eller å bidra under konkurransar, seier Camilla.
Drøymer om kvalifisering til NM: – Noko av det viktigaste er å bygge eit lag som er trygge på kvarandre
Ho fortel at også det å følge laga i konkurransar er veldig motiverande.
– Det er veldig kjekt når ein ser at turnarane og trenarane får betalt for all den innsatsen dei har lagt ned. Og når trenarane og turnarane har det bra og lukkast, så gir det meg glede og motivasjon til å fortsette.
Far til Camilla, Kenneth Silden, er i dag leiar for turngruppa, men Camilla har tatt over fleire av leiaroppgåvene.
– Far min har drive i alle år, og når han skal gje seg må nokon ta over. Han er nok litt av grunnen til at eg gjer det eg gjer, så du kan vel seie at eg går i fotspora hans, smiler Camilla.