Fredag blir det premiere på minidokumentaren Heimen av Dorthe Vaagan, føredrag av forfattar og historikar Gaute Losnegård, og utstilling om losjen og Heimen i Galleri Dorthea, samt open kafé i Kulturhuset Heimen i Bremanger.
Arrangørane fortel at det på slutten av 1800-talet var eit stort problem med drukkenskap i Norge, noko som gjorde at fråhaldsrørsla fekk fotfeste og utvikla seg til å bli ei av dei store folkerørslene.
I heile landet blei det etablert losjar som jobba lokalt for si sak. Mange falt av, men mange heldt også løftet sitt om ikkje å røre verken alkohol eller sigarettar.
I dokumentaren Heimen treff ein tre av dei attverande medlemmane i losjen Havråk, som fortel om opplevingane og minner på losjehuset «Heimen» og betydninga losjen har hatt for deira liv.