Tove Lill Refvik Volle kjenner Anita Solberg både gjennom jobb og privat.
– Eg blei veldig godt kjend med henne då vi var i Berlin i fjor, seier Tove-Lill.
Anita Solberg var i Berlin for å heie på to av spelarane på SIL United som kom med i den norske troppen under Prøve-OL. Fosterbarnet til Tove-Lill, Thea, var ein av desse spelarane.
Medtrenar Morten Hagen var også med til Berlin og Tove Lill synest eigentleg dei fortener ei julestjerne begge to.
– Dei stiller opp kvar einaste måndag til trening. Dei lager til festar og reiser gjennom året til Bergen på turneringar, til Førde og til Florø.
Anita ser spelarane
– Ho viser dei i praksis at dei er verdifulle. Ho motiverer dei og bygger dei opp. Ho ser dei, seier Tove-Lill.
Anita er utdanna sjukepleiar og tilsett i Kinn kommune som tenesteleiar for Måløy/Skaretun heimeteneste og ressurssenter for demensramma. I tillegg starta ho opp og blei trenar for handball-laget for menneske med nedsett funksjonsevne for ein del år sidan.
– Anita jobbar jo i eit omsorgsyrke, men ho har også ein ibuande omsorg. Eg trur ho tok på seg trenarjobben fordi ho kjende at dette er noko ho hadde lyst å bruke ein del av fritida si på. Og ho får nok mykje igjen frå spelarane også.
Det er i alle fall tydeleg at Anita liker å vere trenar.
– Det lyser ut av auga hennar når ho snakkar om SIL United, smiler Tove-Lill.
Anita er eit namn som går igjen fleire gongar i meldingar og e-postar til redaksjonen i Fjordenes Tidende. Ein annan som meiner at Anita bør ha ei julestjerne frå lokalavisa heime er Bjørn Helge Svoren.
– Eg meiner Anita Solberg fortener ei julestjerne med bakgrunn i to ting. Ho gjorde ein betydeleg innstas under covid-perioden med vaksinering, men ikkje minst på grunn av det store engasjementet ho har for handball-laget SIL United, seier han.
– Vi har alle lagt ned mange timer, så det er hyggelig at folk setter pris på det
– Eg elskar å vere saman med laget
– Å, så kjekt! No blir eg heilt rørt, seier Anita då Fjordenes Tidende ringer.
Ho fortel at SIL United gir stor glede i kvardagen.
– Å kunne vere med å bidra til at andre opplever idrettsglede og engasjement er veldig godt. I tillegg er dei ein fantastisk gjeng å vere saman med. Eg elskar å vere saman med dei både på trening, på kampar og turar som vi har, seier ho.
Ho er for tida gira over at laget no har ein landslagspelar som skal til OL.
– Tenk det då! Det er jo heilt utruleg, seier ho, samtidig som ho er tydeleg på at det er laget og samhaldet i laget som er det viktige.
– Det er samhaldet i laget og det vi gjer saman som er det viktige. Og så er det viktig å ha allside aktivitetar i vår del av kommunen som det er behov for, smiler Anita.