Kokkane på Seljetunet ønskjer å gje ei julestjerne til vaktmeistrane i eigedomsavdelinga i Stad kommune. Dei trekk spesielt fram Geir Ove Liseth og Arnt Ove Lunde.
– Dei stiller alltid opp og ordnar ut uansett kva det måtte vere. Det er Geir Ove og Arnt Ove som er her mest, men heile gjengen gjer ein fantastisk bra jobb, seier Caroline Blålid på vegner av kokkane på Seljetunet.
Kokkane fekk sjølv julestjerne frå Fjordenes Tidende i 2020.
Kvar dag jobbar dei for å glede bebuarane med god mat. Dei er kokkar som er stolte av yrket sitt
Avhengig av vaktmeistrane
Blålid viser til at vaktmeistrane bidrar med stort og smått.
– Utan dei er det mykje som ikkje hadde gått rundt på kjøkkenet på Seljetunet, seier ho, og viser til alt kokkane er avhengige av i kvardagen.
– Om omnane, oppvaskmaskinene eller kranene blir øydelagt eller ikkje fungerer, så ringer vi dei og dei kjem og fiksar det. Det hadde vore vanskeleg å gjere jobben om det ikkje var for vaktmeistrane, seier Caroline.
Rosar kokkane
Då Fjordenes Tidende tok kontakt med Geir Ove og Arnt Ove var responsen relativt samsvarande frå dei to.
– Det var jammen sant snilt av dei. Men det er jo dei som skulle fått julestjerna. Er det nokon som fortener det, så er det verkeleg kokkane på Seljetunet, seier Geir Ove.
– Nei, heise det. Det var no dei som burde hatt den, seier Arnt Ove, og held fram:
– Dei gjer ein veldig viktig jobb, så vi må jo prøve å stille opp litt ekstra der.
Takknemlege for julestjerne
Geir Ove, som er arbeidsleiar for vaktmeistrane i ytre, trekk fram heile laget, som i tillegg til Geir Ove og Arnt Ove, består av Håkon Sudmann og Per Inge Brenden.
– Vi kjenner jo ofte på at vi ikkje strekker til, men kjøkkenet på Seljetunet er veldig viktig med tanke på kor mange dei skal levere mat til. Så det er viktig at ting går greitt der, og vi vil jo veldig gjerne hjelpe dei når dei treng det, seier Geir Ove.
Både Geir Ove og Arnt Ove er veldig takknemlege for julestjerna som dei no får på basen til vaktmeistrane.
– Dette var ein veldig kjekk beskjed å få. Vi prøver å gjere vårt beste, og då er det veldig kjekt med tilbakemelding, smiler Arnt Ove.