Det er ordførar Lena Landsverk Sande som meiner Knut Ingvald bør få ei julestjerne for den store jobben han gjer med å glede andre.
– Eldsjela Knut Ingvald Bøstrand står bak denne utruleg fine aktiviteten. Han sponsar straum frå eige kraftverk, og har etter kvart fått med seg fleire til å sponse julelenker og til å bidra til å henge opp alle lysa, seier ho.
Dette er berre litt av juletreskogen. Bildet var tatt rundt juletider i fjor.
Foto: Erling Wåge
Landsverk Sande meiner juletreskogen er noko heilt spesielt.
– Den gleda han gir oss alle som ser skogen frå bygda, på vegen opp eller ned frå Kvilehytta, den kan vanskeleg skildrast, seier ho.
Ho oppfordrar folk om å ta seg ein tur til Åheim for å sjå det vakre synet.
Landsverk Sande meiner ei julestjerne hadde vore ei fin oppmuntring til Knut Ingvald.
– Han gjer ein enorm innsatsen for å glede alle i sitt nærområde no i jula. Han er eit unikum, seier ho.
Heidi Endal frå Åheim er einig med Landsverk Sande.
– Knut Ingvald og medhjelparane hans fortener verkeleg ei julestjerne, seier ho.
Fjordenes Tidende besøkte juletreskogen førre jul og såg korleis den lyser opp området.
