Både elevar og lærarar ved Vågsøy ungdomsskule håpar revyen dei sette opp førre veke kan leggje grunnlaget for ein ny tradisjon.
– Det har vore kjempekjekt å planleggje og vise fram Hurra og farvel. Sjølv om dette var ein hyllest til skulen fordi den skal rivast, håpar vi at det er mogleg å setje opp fleire revyar i framtida, seier åttandeklassingen Rikke Otneim som var med på scena.
Både Otneim og klassekameratane var strålande nøgde med eigen innsats, og glade for at alt gjekk som det skulle både framfor og bak sceneteppet.
– Vi var ikkje nervøse før vi gjekk på scena, likevel hadde vi aldri trudd det skulle gå så bra, fortel Henrik Søraa.
– Eg er kjempestolt av elevane og den jobben dei har gjort. For rundt ein månad sidan var eg veldig usikker på korleis dette skulle gå, men vi har klart å snu alt kaoset til eit knirkefritt arrangement, fortel lærar, Espen Larsen.
Han legg til at også han ynskjer å halde fram med revyproduksjon i åra framover.
– Tanken er at dette skal bli ein tradisjon for at fleire skal få lyst til å prøve faget sal og scene. I tillegg vil dei på barneskulen kunne gle seg til ungdomsskulen, for då får dei vere med på revy, smiler Larsen.
Les meir i papirutgaven av Fjordenes Tidende.