– Opphavleg var ideen å setje opp ein stein for Olav den Heilage, men så har vi utvikla ideen til å inkludere alle «Olav-ane», fortel Torkjell Djupedal i Venner av Selja kloster.

Neste år, forhåpentlegvis med kongehuset til stades, skal Olavssteinen avdukast på Bø på Selja.

– Det var i etterkant av tusenårsjubileet i 2015 at Olav den Heilage steig i land på Selja at det blei tydeleg kor viktig rolle han hadde for Selja. Olav den Heilage blei den store mellomalderkongen og nasjonalhelgen. Og Sunniva og Olav er radarparet i helgenhistoria i Norge. Begge var kongelege, den eine med tyngdepunkt i Trøndelag og den andre på Vestlandet, fortel Djupedal.

Legenda om begge blei også skriven ned rundt same tidsperiode.

Men fleire kongar med namnet Olav har også hatt stor historisk betydning for Selja i tillegg til Olav Haraldsson, seinare Olav den Heilage (Olav II).

Helgenstad i 996

Olav Tryggvason (Olav I) gjorde nemleg Selja til helgenstad allereie i 996, 19 år før Olav den Heilage så blei den første kjende pilegrimen til å sette sine bein på øya i 1015.

– Det var symbolsk. Olav den Heilage kom til landet for å bli konge og den første plassen han går på land er Selja. Historia seier at han trakka ned i eit myrhol og sette seg fast. Og då sa skalden: «Nei, konge. No feste du foten i landet».

Olav I, Olav Tryggvason, på si side, var på Dragseidet, og kristna også Vestlandet.

Olav Kyrre (Olav III), som vart konge i 1066, delte Norge opp i bispedøma Nidaros, Oslo og Selja.

– Bispedømet strekte seg frå Sunnmøre til og med Agder, og Selja låg i utkanten. Det viste kor viktig Selja var for Olav Kyrre, seier Djupedal.

50 år sidan

Den siste kong Olav som besøkte Selja var Olav V i 1968.

– Det var første gong i moderne tid at Selja blei løfta fram i det norske bildet og historia. Det var ein enorm happening med 10.000 menneske på Selja. Det var jo også første gongen Harald og Sonja viste seg offentleg. Dei gifta seg like etter, så det kan jo vere ein ekstra motivasjon for dei til å seie ja til invitasjonen om å kome tilbake til Selja 50 år etter og avduke Olavssteinen.

Bautasteinen på to meter har venelaget funne på Skårbø i Selje.

– Vi fekk løyve frå grunneigar til å hente den ut. Det skal graverast inn tekst på ein verkstad i Lom før den så blir frakta tilbake til Selje.