– Eg og fleire har vore inne på tanken om å nominere mannskapet. Dei er veldig serviceinnstilte og koselege folk, så dei fortener ei julestjerne, seier Audny.
Ho har budd på øya Barmen i snart 60 år og har brukt ferja som går mellom Barmsund og Barmen mykje. Audny omtalar ferja som livsnerven for innbyggjarane.
– Det er alltid hyggelege og imøtekomande. Skjer det noko som gjer at vi må ha hjelp, så stiller dei opp og viss vi er litt seine, så går det an å ringe. Det er aldri nei i deira munn.
Ho trekk også fram mange at det blir mange gode samtalar med mannskapet på overfarten.
Då Fjordenes Tidende tok kontakt med matros Tor Ivar Østreng for å fortelje at mannskapet har fått julestjerne er det ein smilande mann som svarar.
– Dette var veldig hyggeleg. Det varmar eit gamalt hjarte, seier Østreng.
Han utgjer mannskapet på Barmen saman med Stig Evjen, Bjørn Røyset og Igor Nielsen.
– Vi har det veldig fint. Vi har fine jobbar og flotte kundar, smiler Østreng.
Det at Audny trekk fram gode samtalar synest Østreng er kjekt.
– Det er veldig triveleg. Vi er eit lite samfunn og ein fin gjeng, avsluttar han.
