– Det er veldig utfordrande for oss å rekruttere. Det er det ingen tvil om, fortel dagleg leiar Hans Inge Solheim i Normatic.

Verksemda han leiar har mellom 55 og 60 tilsette, og omset for 100 millionar i året.

– Skal vi ta oss vidare og utvikle oss må vi sikre vidare- og etterutdanning til våre tilsette. I tillegg ser vi at mange av lærlingane som har tatt fagbrev ønskjer seg vidare utdanning. Per i dag har vi ingen tilbod om dette i Nordfjord.

Normatic ønskjer saman med verksemdene Caverion, Eid Elektro, Moderne Varme, Nordplan, Fjordvarme og Segel å utvikle eit «campus-område» på Nordfjordeid.

– Elektro og automasjonsmiljøet i Nordfjord har allereie teke posisjonar på den nasjonale og internasjonale marknaden. Om vi skal hevde oss i den raske utviklinga som no skjer, må det tenkjast heilt nytt. Vi må få til endå tettare samarbeid og høgare innovasjons-takt i heile bedriftsmiljøet, og eit nært samspel med forskings- og utdanningsmiljø nasjonalt og internasjonalt, seier Solheim.

Planen er at campus-området skal innehalde ein virtuell del der ein etablerer ein arena for læring og innovasjon mellom regionale innovasjonsaktørar og med høgskule- og FoU aktørar nasjonalt og internasjonalt. I tillegg har prosjektet og planane ein fysisk del.

– Nordfjord Sjukehus, Eid vidaregåande skule og Nordøyrane der Normatic i dag held til og har 16 mål ledig tomeareal. I dette området er der ei eksisterande byggmasse som kanskje kan utnyttast enda betre, men samtidig òg eit stort areal for å bygge nytt i høve dei behova ein avdekkjer, heiter det i ei pressemelding frå prosjektet.

Hans Inge Solheim i Normatic fortel at ein ønskjer å få til nodar, for eksempel frå ingeniørhøgskulen og teknisk fagskule i Førde, på Nordfjordeid.

– Vi ønskjer veldig sterkt å få til eit slikt tilbod. Då kan lærlingane eller dei tilsette få utdanning samstundes som dei arbeider i bedrifta, seier han.

Vil gå i gang i 2019

Prosjektet er inne i eit forstudium som skal avsluttast før sommarferien. Prosjektleiar Trond Haavik i Segel fortel at hausten går med til eit forprosjekt.

– Då skal prosjektet konkretiserast. Forhåpentlegvis er vi ferdige ved årsskiftet. Vi håpar at vi i 2019 kan byrje å jobbe med innhald og setje i gang konkrete prosjekt, fortel han.

Haavik seier vidare at initiativet frå bedriftene har møtt stor interesse frå Helse Førde, Eid kommune, Fylkeskommunen, Høgskulen på Vestlandet og Fagskulen i Sogn og Fjordane.

– Blant bedriftene som er med, finst det mangeårig erfaring i samarbeid med forskingsmiljø internasjonalt, og ein har innleia samtalar for å få involvert relevante miljø frå andre landt

Planane blei fredag presentert for statssekretær frå Venstre for forsking og høgare utdanning i Kunnskapsdepartementet, Rebekka Borsch.

– Eg er verkeleg imponert over jobben det lokale næringslivet og Eid kommune har gjort så langt for å løfte og konkretisere planen om Nordfjord Virtuelle Campus. Prosjektet passar godt inn i regjeringa sin strategi om å knytte saman utdanning, forsking og bedrifter enda betre og gje fleire moglegheit til etter- og vidareutdanning – uansett kvar folk bor og jobbar. På besøket mitt fekk eg tydeleg inntrykk av at i Eid jobbar vidaregåande skole, lokale bedrifter og kommunen tett saman og deler same høge ambisjonsnivå, uttalte ho.

Campus-prosjektet har tidlegare fått støtte frå Nordfjord Vekst og det kommunale næringsfondet. I tillegg har bedriftene bidrege økonomisk.