Takka vere iherdig dugnadsinnsats kan Flatraket Småbåtlag no stolt vise fram den nye småbåthamna i bygda.
– Medlemene er utelukkande positive, seier ein glad representant for styret i Flatraket Småbåtlag SA, Gisle Flataker, som etter ei nysatsing i laget kan vise fram eit flunkande nytt anlegg på Flatraket.
48 båtar
Det er blitt plass til 48 båtar ved bryggja, og dei fleste plassane er alt utleigde eller selde.
– Vi har berre nokre få plassar ledige, og dei er eg rimeleg sikker på kjem til å gå kjapt, seier Gisle Flataker.
Ved utlegginga auka ein talet på plassar i småbåthamna på Flatraket frå 43 til 55. Ein fekk sju nye plassar ved gjenbruk av ei bryggje og ein landgang lengst inne i hamna.
– Vi brukte den nyaste av dei gamle bryggjene, og det blei ein bonus, seier Flataker.
40.000 kroner
Gisle Flataker, som er kasserar, seier at kostnaden med det nye anlegget er på 1,7 millionar kroner. Det nye samvirkelaget hadde ein eigenkapital på ein halv million kroner.
Det blir no litt dyrare å kjøpe seg ein plass.
– Dei kostar opp under 40.000 kroner, og i tillegg kjem medlemskontingenten på 5.000 kroner, seier Gisle Flataker.
Dugnadsarbeid
Han seier at det har vore eit godt lagarbeid som har gjeve Flatraket Småbåtlag eit nytt anlegg. Men den som har stått mest på er lagsleiaren Dag-Rune Gjengedal.
– Han har vore den verkelege eldsjela, og eg trur at han har like mange dugnadstimar som oss andre til saman. Han er no vekk på ein fortent ferie, fortel Gisle Flataker då Fjordenes Tidende var på besøk denne veka.
Brukte sandanker
Heile anleggsutlegginga gjekk som planlagd. I staden for å bruke lodd og feste i land, vart det brukt sandanker som vart dregne fast i botnen.
– Det vart gjort med 2,5 tonns kraft. Det vart lagd ut ti anker, og dessutan plassert ut nokre lodd på stader der det var fjellbotn, fortel Flataker.
Etter at seksjonane var leverte, tok det ikkje lang tid før den nye flytebryggja var komen på sjøen.
Nettopp klar til bruk
Den nye stålbryggja er produsert i Tyskland, og styremedlem Gisle Flataker seier at det er lagd vekt på også tryggleik ved val av løysing.
Bryggja er tre meter brei og har ei sklisikker gangbane langs midten. Utriggarane er 60 og 30 centimeter breie og du kan gå ut på begge sider av båten.
– Dette er ganske unikt, seier Flataker.
Lengda på utriggarane er seks meter, men dei kan lett forlengast, og nokre er alt bygde ut til åtte meter.
– Det er også enkelt å justere breidda på båsane. Du gjer det med å løyse to mutterar og dra utriggaren sidelengs, forklarar Gisle Flataker.