Kystruteskip skulle innom Måløy – blir halde igjen i Bergen på grunn av Russland-sanksjonar

Skipet trafikkerer kystruta Bergen-Kirkenes, der selskapet Havila Kystruten deler anbodet med Hurtigruten.

Det skulle ha forlate Bergen ved 20-tida tysdag, men låg ved midnatt framleis ved kai. Dette skuldast sanksjonar mot den russiske långivaren GTLK, stadfestar kommunikasjonsansvarleg Lasse A. Vangstein i Havila overfor Bergens Tidende.

– Det er ei uvisse rundt forsikringsdekninga som gjer at avgangen er utsett. Det er ein situasjon som har oppstått som følgje av sanksjonar mot leasingselskapet som har finansiert Havila, seier han.

Selskapet er i kontakt med norske styresmakter for å avklare situasjonen, og Vangstein beklagar overfor passasjerane. Han understrekar også at selskapet er norsk og at skipet for alle praktiske formål er norsk.

– Vi har støtta sanksjonane mot russiske selskap. No jobbar vi med å refinansiere dette skipet for å bryte russiske band, seier Vangstein.

Etter at Russland invaderte Ukraina i slutten av februar i år, har verda reagert med omfattande sanksjonar mot landet.

(©NPK)