Måndag ga Statens vegvesen grønt lys for kolonnekøyring gjennom Skatestraumstunnelen. Det er Linda Svarstad i Rutebilane i Bremanger glad for.
– Kolonnekøyringa er ei veldig god løysing for oss. Vi er veldig fornøgde med at talet kolonner steig frå sju-åtte til ti. Og tidene passar også for oss, seier driftsleiar Linda F. Svarstad i Rutebilane i Bremanger.
Åpner for kolonnekjøring i dag
Når tunnelen no opnar for ei viss gjennomfart, får det lokale busselskapet gjennomført bussruter som dei måtte innstille etter eksplosjonen i juli.
– No får vi gjennomført ruta frå Bremanger til Svelgen tre dagar i veka. Vi får også godsruta i gang igjen. Og til forskjell frå ferja kjem alle med, det er ikkje plassbegrensningar, seier Svarstad.
Mange har fått merke at bussane ikkje har fått køyre.
– Det er mange som pendlar internt i Bremanger, frå Kalvåg, Bremanger, Leirgulen til Svelgen. Det er mange som ikkje har hatt ei tilbod i denne perioden.
Jobbar døgnet rundt
For tiden arbeider Statens vegvesen døgnet rundt i tunnelen.
– Vi jobbar så raskt vi kan, meiner vi. Det er begrensa kor mykje arbeid ein kan gjere i tunnelen samtidig. Det er mange arbeidslag og mange typer arbeid, forklarer Margot Åsebø.
Tilhengeren var 18 år gammel
Akkurat no er dei ferdig med mesteparten av sprengingsarbeidet som var viktig for å få til kolonnekøyringa. Etter det går ein i gang med reparasjonar og legging av 500 meter med drensgrøfter.
– I tillegg borar vi bolt for vatn- og frostsikring. Når alt PE-skummet er på plass her, sprøyter vi heile tunnelen med eit åtte centimeter lag med betong for å gjere det brannsikkert, fortel Åsebø.
Vegvesenet installer også fire nye vifter, nye nødstasjonar med brannslokkingsapparat kvar 150. meter, nye evakueringslys kvar 25. meter og nytt lysanlegg i den øydelagte delen av tunnelen. Dei jobbar på spreng og om natta får dei jobbe uforstyrra.
– Ja, behovet er ikkje så stort for transport om natta, så den har vi held fri for bilar. Å få jobbe uforstyrra er med på å halde kostnadene nede, seier Åsebø.
– Er kolonnekøyringa også billigare enn å ha ferja gåande?
– Vi håper å få ned kostnadene med dette, ja, seier Åsebø.