Vest politidistrikt melde onsdag klokka 17.26 at ein bil med to personar hadde køyrt utfor vegen på fylkesveg 614 mellom Grov og Norddalsfjorden før Norddalsfjordbrua.
– Det er to personar involvert. Førar, ein mann i 70-åra og ei kvinne i 90-åra. Førar seier seg uskadd. Kvinna opplyser å ha smerter i brystet, melder Vest politidistrikt.
Politiet opplyser at kvinna vart sendt med ambulanse til legevakta i Florø. Det skal vere glatt på staden der ulukka hende.
Bilen skal ha køyrt i retning Svelgen og kome utfor vegen.
– Det er store materielle skader på bilen, og airbagen er utløyst, seier operasjonsleiar i Vest politidistrikt.
Bilen blokkerte eine køyrefeltet og bergingsbil vart rekvirert.