Skipsdesignmiljøet i Vågsøy leverer nybygg på rekke og rad, og hos Naval Consult står selskapet sin nye daglege leiar klar til å utvide aktiviteten.
– Vi ser at her er mykje større moglegheiter enn det vi har kapasitet til å handtere no. Vi har allereie sikra omsetninga vi treng for 2017, slår Erlend Hagen fast.
Sidan september har han vore dagleg leiar for Naval Consult – selskapet han forlét for fire år sidan for å jobbe som contract manager i Rolls-Royce i Ulsteinvik.
– Eg ønska å jobbe meir internasjonalt, og fekk ansvaret for utstyrs- og designpakkar vi selde til verft rundt om i verda, forklarer Hagen, som var involvert i fleire store prosjekt i mellom anna India og Kina.
Planen var derimot heile tida å returnere til Naval Consult for å overta styringa etter Johan Kongsvik, som etablerte selskapet i 1983.
– Vi har fått ein veldig god dagleg leiar og kompetansen hans blir veldig viktig i våre internasjonale prosjekt, meiner Kongsvik.
Då han starta selskapet for 33 år sidan, i kontor vegg i vegg med verftet Blaalid, fanst det på ingen måte eit skipsdesignmiljø i Vågsøy frå før. Det gjer det i aller høgste grad no.
I tillegg til Naval Consult har Vågsøy-selskapa Skipskompetanse og Seacon sikra seg store kontraktar om levering av design til nybygg innan fiskeri- og havbruksnæringa det siste året. Begge selskapa vert leia av personar med ei fortid i Naval Consult.
– At vi har to konkurrentar i Måløy er berre positivt. Kan vi ikkje leve med konkurranse, så er det berre å gi seg, smiler Kongsvik, før Hagen legg til:
– Vågsøy har utvikla seg til å bli eit senter for skipsdesign i landet. Og innan kystfiskefartøy som vi har spesialisert oss på, så har Vågsøy-selskapa ein stor marknadsandel i Norge.
Rundt 25 tilsette jobbar i dei tre skipsdesignselskapa. I tillegg har kommunen ikkje mindre enn fem verft og ein rekke andre selskap er i næringsclusteret. Dette clusteret vil Naval Consult og Hagen bidra til å utvikle og dei ønskjer no å utvide staben på Raudeberg.
– Vi har tenkt å gjere tilsettingar i løpet av november, og er veldig interessert i oppnå kontakt med folk frå distriktet i utdanning eller som sit i tilsvarande jobbar andre stadar.
Han meiner i det heile tatt at moglegheitene er mange for dei som ser mot kystkommunen.
– Utviklinga i Vågsøy er veldig positiv. Då eg var tenåring var her fiskebuer overalt. Det var kjempegreier for ungdommen som kom seg rett i jobb, men for folk med utdanning var moglegheitene meir avgrensa. No har ein mellom anna fleire reiarlag, Coast Seafood, klynga av verksemder som Gunnar Carlson har bygd opp (LocalHost, Videonor, EasyForm etc.) og tre skipskonsulentselskap som etter kvart forhåpentlegvis vert så store at der vil vere plass til fleire profesjonar enn reine ingeniørar. Då skulle arbeidsmarknaden her bli meir og meir freistande for folk utanfrå, meiner Hagen.
Det er godt nytt for Naval Consult som ser behovet for meir kapasitet når talet på etterspørslar aukar.
– Sidan 2010 har det vore lite nybygg innan kystfiskeflåten. No har det derimot vore eit oppsving og vi får mange førespurnader om. Det er ein gammal flåte og det er derfor eit stort tal nye båtar som skal byggast framover, seier Johan Kongsvik.
I sommar vart det kjent at reiarlaget Mirsel har bestilt eit 38 meter langt kystfiskefartøy etter design frå Naval Consult. Sander Andre, som fartøyet skal heite, skal leverast frå Larsnes Mek Verksted i tredje kvartal av 2017.
Samtidig vart det klart at reiarlaget Arvesen har bestilt eit tilsvarande fartøy som får namnet Nordhavet. Dette fartøyet skal leverast frå sunnmørsverftet i andre kvartal av 2018.'
I oktober sikra Naval Consult si tredje kontrakt på kort tid då Kristoffersen Fiskebåt bestilte eit nybygg. Også dette fartøyet, Gunnar K, skal byggast ved Larsnes Mek Verksted og overlevering er sett til desember 2017. Skroga til alle tre kystfiskefartøya skal byggast i Polen. Båtane riggast for snurpenot og snurrevad og sjølv om fartøya i utgangspunktet vert bygd etter same design, har reiarane gjort ei rekke individuelle tilpassingar.
– Reiarane får det dei vil ha. Skreddersøm til kvar kunde er noko som kjenneteiknar oss, forklarar Erlend Hagen, og legg til:
– Vi satsar på å bygge fleire slike fartøy. Dei er veldig godt eigna til fiskeriet dei driv, og det er mange reiarlag med liknande behov.