I tre veker har delar av Måløyraidsenteret vore ope for publikum. Den offisielle opninga av Måløyraidsenteret skjer med kronprinsparet på plass 23. august, men alt no er det mange som har teke turen for å sjå museet om krigshistoria i Måløy.

– Vi har hatt rundt 40 besøkande om dagen. Det er vi veldig nøgde med. Vi opna jo senteret midt i fellesferien, fortel Ramsevik Kvalheim.

Måløyraidsenteret opna dørene for publikum med ei lita markering laurdag 7. juli. Så langt har senteret fått god respons frå publikum.

– Vi har berre fått fantastisk positive tilbakemeldingar. Folk seier dei gjerne vil kome att når alt er oppe og går, fortel senterleiaren om responsen frå dei besøkande.

Internasjonal interesse

Blant dei besøkande har det vore ein god del turistar, både norske og utanlandske.

Ei av gruppene som har besøkt senteret og fått omvising var frå Royal Marines, det britiske marineinfanteriet, som var i Noreg for å lære meir om operasjonar utført her i landet under krigen. I Måløy fekk dei omvising av Lars Kjølen.

– Det var veldig kjekt å vise dei rundt. Det er ikkje daglegdags kost for meg, men det var veldig artig, fortel han.

Gruppa kallar seg «Norway 75», og var her for å besøkje seks historiske område i Noreg der det vart gjort angrep på tyske stillingar under krigen. Dei reiste med kajakk og sykkel heile vegen frå Finnmark til Rjukan. I Måløy fekk dei sjå minnesmerke, hus med kulehol, og dei fekk omvising på senteret.

– Vi starta på Moldøen og enda på Måløyraidsenteret, fortel Kjølen.

Han seier vidare at dei var særleg opptekne av kvar dei allierte gjekk i land, korleis kampane gjekk føre seg og kor mange som omkom.

– Dei var veldig imponert over kva vi har fått til.

Omvising i gata

Måløyraidsenteret kan også tilby guiding for større grupper, der ein får sjå dei historiske stadane som ligg utanfor senteret.

– Det er fleire grupper som har ønska å få omvising. Vi har Terje Sølvberg som er lokalhistorikar, som tar dei med i det som skal bli «Måløyraidløypa», frå senteret til Moldøen.

– Men på senteret i seg sjølv er det ikkje naudsynt å ha guide for å få med seg historia. Der er både lyd, bilde og video, i tillegg til at det vil bli audioguide og tekst på engelsk og tysk, fortel Ramsevik Kvalheim.

Autentiske element

Det som til no er mogleg å sjå av senteret er første etasje med resepsjon og butikk, og andre etasje, der ein kan få med seg forteljinga om Måløyraidet.

– Det startar med at ein høyrer troppane marsjere inn i Måløy, og deretter går ein gjennom opplevinga av Måløyraidet, fortalde Helge Hjelle til Fjordenes Tidende på opningsdagen 7. juli.

– Utstillinga er bygd opp rundt autentisk film, lydopptak, grafisk design og gamle gjenstandar. Dei fleste sansar skal etter kvart takast i bruk her med lyd, lys og lukt til og med, heldt han fram.

Etter at kronprinsparet har opna Måløyraidsenteret 23. august, blir dei resterande avdelingane opna for publikum. Då får ein sjå tredje etasje som fortel historia om Martin Linge, Lingekompaniet og Shetlandsfarten. Ein vil også kunne gå i tørrskoddgangen som fører inn til den gamle, tyske medisinbunkersen som ligg bak Heradsheim.

– Det står att ein del som står att før den offisielle opninga, men det skal bli klart, fortel Ramsevik Kvalheim.