Etter å ha halde til i eige bygg nord i Gate 1 i 40 år, er Fjordenes Tidende no på flyttefot. Dei nye lokala blir i bygget som heiter Framsteg midt i sentrum av kystbyen.
Skal inn i ærverdig bygg
Mange har ønskt seg inn i det bygget, og no får Fjordenes Tidende lov å flytte dit.
– Det er eit ærverdig bygg og vi ser fram til å få lokale som er meir eigna til å møte framtida og understøtte satsinga vår, seier Fagerli og legg til:
– Vi ønsker å levere det beste produktet, både på papir og digitalt, og vi riggar oss derfor som eit moderne mediehus. Då spelar lokala ei stor rolle.
I andre etasje i Framsteg er det det skjer. Her vil både redaksjonen og marknadsavdelinga sitte i ope landskap, men element i innreiinga og ikkje minst store glassflater vil gi litt skilje.
– Lokale vil framstå som opne, det er høgt under taket og store vindaugeflater som skapar luft. Sjølv om vi sit samla i det store lokalet vil redaksjonen og marknadsavdelinga framleis ha eit skilje mellom seg, slik det skal vere, forklarer han.
Lokala vil dermed betstå av marknadsavdeling og redaksjon, eit kjøkken med loungestemning og sitjegruppe, eit video- og podkaststudio, eit romsleg møterom, bibliotek og fleire små arbeids- og stillerom vil vere noko av det ein finn i hos nye Fjordens Tidende.
– Vi ønsker oss fleksible lokale der vi kan jobbe på ulike måtar og jobbe sånn det passar oss. Bransjen har fornya seg kraftig dei siste åra, og vi treng lokale som gjer det lettare og meir effektivt å lage nyheiter også digitalt og gjennom levande bilde og lyd.
– Motiverande og inspirerande
Dei tilsette i Fjordenes Tidende har jobba saman med arkitektane i Metropolis Arkitektur & design for å komme fram til dei beste løysingane, og ein av tankane har vore å hente den flotte naturen inn i lokala.
– Det er veldig viktig å ha det bra på jobb og vi håper lokala blir både motiverande og inspirerande. I tillegg ønsker vi at både kundar, dei vi intervjuar og andre besøkande skal kjenne på ein god og kreativ atmosfære når dei kjem inn til oss, smiler Fagerli.
Arkitektane i Metropolis har også dei store medieklyngene i landet på CV-en og kunne stille med relevant erfaring for å dekke Fjordenes Tidende sine behov.
– Vi kjem derfor til å få lokale som er fullt på høgde med dei store mediehusa i dei store byane, berre i eit mindre format. Dette er også viktig med tanke på rekruttering til bransjen. Tilbakemeldingar frå studentar i journalistikk og marknadsføring er at omgjevnadar har mykje å seie for kreativiteten og arbeidsgleda og ikkje minst oppdatert og godt utstyr og fasilitetar.
– Men mange vil sikkert spørje om kvifor vi ikkje berre pussar opp lokala vi er i i dag?
– Fjordenes Tidende er eigd av Polaris Media. Konsernet vårt ønsker ikkje at vi mediehusa skal bruke tid på å vere eigarar av eit bygg, men heller ha fokus på å produsere gode produkt og tenester til både annonsørar og lesarar. Vi gler oss også å flytte nærmare sentrum. Vi ønsker å vere med på å ta vare på Gate 1 og bidra til eit pulserande liv der.
Gode samarbeid
Leigeavtala er på tolv år, og Fagerli omtaler samarbeidet med huseigar RMA Invest og Ronny Almenning som veldig godt.
– Dei har vore serviceinnstilte frå dag ein, og ønskt oss hjarteleg velkomne. Vi har fått lov å vere med på å utforme lokala slik vi ønsker og gler oss til det vidare samarbeidet. Vi begynner å rigge til i løpet av hausten.
DVI har fått jobben med å pusse opp heile andre etasje til Fjordenes Tidende.
– Det er ein spennande jobb. Det er kjekkare å renovere enn å bygge nytt. Spesielt det å få eit bygg som har stått i gatebildet og forvitra og forfalt til å blomstre opp igjen, seier dagleg leiar, Fritjof Skaar, i DVI.
Prosessen med å flytte Fjordenes Tidende inn i nye lokale starta allereie i november 2021, og Fagerli synest det er godt at kontrakta no endeleg er skriven under og at han no kan dele planane med lokalmiljøa.
– Kva skjer med bygget som Fjordenes Tidende er i i dag?
– Den avgjerda ligg hos eigarane av bygget, Sunnmørsposten. Dei har nyleg skilt ut bygget som eit eige eigedomsselskap. Så Fjordenes Tidende er no formelt sett berre leigetakar i bygget, seier Fagerli.
– Vi gler oss veldig
Dei tilsette i Fjordenes Tidende gler seg også til dei kjem på plass i eit heilt nytt miljø, midt i Måløy sentrum.
– Nye lokale trengst verkeleg. Samtidig er det veldig kjekt. Det har vore fint å bli involvert frå starten og får sagt kva vi har behov for og kva vi ønsker for å ha ein god arbeidsplass i åra framover. Vi gler oss veldig til å flytte sørover, seier Marianne Solheim Rotihaug, klubbleiar i redaksjonen.