– Vi begynte først å sjå etter andre hus sånn at foreldra mine skulle skjønne at det hasta litt før ungane blei større. For vi ville jo at ungane skulle føle at dette huset var barndomsheimen deira, ler Mats.
Og det enda med at dei rett og slett bytta hus. Foreldra til Mats flytta inn i huset som Ingvill og Mats hadde budd i sidan 2009 og dei flytta inn i Mats sin barndomsheim. For Mats var det spesielt å komme tilbake.
– Ein har så mange minne. Vi held framleis på med oppussinga, og prøver å behalde det vi kan behalde.
Anita og Svein Arne elskar den spektakulære utsikta si. No vil dei dele den med andre
– Kjellarstua var Mats sitt rom og der hadde han ein liten bar som han var veldig glad i. Dette rommet er ikkje ferdig enno, men baren måtte han gje slepp på, ler Ingvill.
I det same rommet er det faktisk ei slags scene eller podium, som stammar frå tida å faren til Mats, Knut Ole, hadde Team trafikkskule i huset.
Den er så spesiell og har med seg så mange minne at dei jobbar med ein plan for å prøve å behalde den.
Har laga open løysing
Den største forandringa i huset har skjedd på stua og kjøkkenet som før var fleire mindre rom. I stua stod det også ei stor pipe med mursteinbekledning midt i rommet.
– Vi har fjerna pipa og opna opp mellom stua, kjøkkenet og gangen. Ungane elskar å springe i ring rundt her. Dette gjorde også sånn at kjøkkenet blei mykje større, forklarer Ingvill.
Dette er utsikta frå hytta til Siri Kitt og Kent Rune. Bli med på besøk
Stua og kjøkkenet har derfor blitt favorittromma.
– I spisestua har vi sett inn eit ekstra vindu for å få endå betre utsikt. Så når ein sit der, ser ein Hornelen frå den finaste vinkelen, smiler Mats.
John-Terje skulle berre erstatte taket på den gamle smia etter ein orkan: – Men så balla det på seg. Mildt sagt
Vil skape ein heim
Å få huset til å kjennest som deira har vore viktig for sambuarparet. Då dei flytta inn i det første huset sitt, var dei svært unge og hadde ikkje utvikla stilen og smaken sin enno.
– Eg var 18 år og hadde ikkje peiling. I dag er det fleire inspirasjonskjelder og etterkvart har vi kanskje opparbeidd oss ein slags stil. Det er ein blanding av gjenbruk, litt minimalistisk, men ikkje nakent og nordisk med lyse fargar, seier Ingvill.
Dei har gjenbrukt mange av møblane dei sjølv hadde og møblar som stod i huset, og spisebordet har dei laga sjølv.
– Vi fann ei bartralle på loftet, så den måtte ned, seier Mats.
På kjøkkenet har dei valt praktiske løysingar som store benkeplater, moglegheit for kokande vatn i springen, vinskap, varmeskuffe som held maten varm og ei vifte i midten på sjølve komfyrplata.
– Vi ville nyte utsikta medan vi lager mat. Då kunne vi ikkje ha ei vifte hengande over komfyren. Og varmeskuffa er praktisk sidan eg ofte jobbar seint og då held middagen seg varm til eg kjem heim, smiler Mats.
Elska oldefaren si trapp
Sjølv om dei ønskte å behalde trappa ned til kjellaren bestemte dei seg for å lage ny.
– Oldefaren til Mats hadde laga den gamle, men den var så bratt, forklarer Ingvill.
– Eg syntest den var kjempefin, men den var jo farleg. Eg veit ikkje kor mange gongar eg har ramla ned den trappa. Så no har vi ei betre trapp med lys i. Vi bestemte oss også for å setje inn eit vindu i kjellaren der trappa kjem ned for å få meir lys og få sjå ut, seier han.
For sjølv om ein er i kjellaren av huset, er utsikta fantastisk sidan huset ligg på toppen av det som blir kalla «Golan-høgda» i Deknepollen.
Ingvill og Mats er også veldig glad i uteområdet sitt.
– Og frå verandaen ser vi ned på gamlehuset vårt der foreldra mine bur no, smiler Mats.
Denne saka er henta frå Nordfjordsamkøyringa sitt Hus og heim-magasin. Her kan du lese heile magasinet.