Båt gjekk ned – ferjemannskap redda to personar opp frå sjøen

Litt før klokka 22.00 onsdag kveld fekk Hovedredningssentralen melding om at ein fritidsbåt med to personar om bord tok inn vatn sør for Måløybrua.

Ferja MF Hornelen, som var sørgåande, var næraste ressurs. Dei vart kalla opp av Kystradio Sør for å hjelpe til, opplyser Hovedredningssentralen til Fjordenes Tidende.

– To personar har vore i vatnet, men dei har blitt plukka opp, og det er ingen som er sakna, sa operasjonsleiar Dan Erik Johannessen i Vest politidistrikt til Fjordenes Tidende klokka 22.15 onsdag kveld.

Hovedredningssentralen opplyste litt før klokka 22.30 at ferja hadde returnert til Måløy der dei to personane som var i fritidsbåten vart sett til av ambulansepersonell.

– Personane vart raskt plukka opp av mannskap om bord i ferja og er i god behald, seier vaktleiar ved Hovedredningssentralen.

Vegtrafikksentralen Vest opplyste klokka 22.17 at ferjesambandet Måløy-Oldeide vart innstilt inntil vidare grunna redningsaksjonen.