Slik situasjonen er i dag, når ein kjem i retning Selje i 80-sona, så møte ein først eit 70-skilt ved hamre, før farta blir redusert til 50 rett før ein kjem til Selje skule.
Denne nedtrappinga er det fylket ønsker å fjerne, noko som kjem fram i den aktuelle skiltplanen. Der er heile 70-sona fjerna, noko som betyr at ein heller ønsker å gå direkte frå 80- til ei 40-sone nedanfor sjukeheimen, og altså forbi skulen.
– Det er jo bra at det blir 40-sone forbi skulen, men eg må seie at vi er litt rysta over at dei no ønsker å auke farta inn til denne til 80. For då trur vi at farta vil bli høgare forbi skulen enn den er i dag, seier leiar ved FAU i Selje, Thomas Flølo.
Reagerer på argumentasjonen
Det er dei såkalla overgangssonene fylkeskommunen ønsker å bli kvitt for å heller oppheve eller auke fartsgrensa i eitt steg.
Og når det gjeld måten dei har kome fram til dette på når det gjeld den aktuelle strekka i Selje, så får det Flølo til å riste på hovudet.
– Det har hatt fartsmåling av vegen, og grunnen til at dei derfor ønsker å sette opp farta til åtti, er at snittfarten dei målte var på 75 km/t. Dei hevdar at det då gir ein falsk tryggleik om det framleis står sytti når folk faktisk køyrer raskare. Eg har spøkt med at då kan vi berre presse på litt då, så får vi snart ei 110-sone. Så det er berre rart, seier Flølo.
På den nemnde strekka er det i desse dagar stor aktivitet til og frå tomta til det nye helsesenteret i bygda. I tillegg er det innkøyring til sjukeheim, eldretun, camping og heimeteneste, og til tre ulike bustadfelt. På toppen av dette kjem alle ungane som går til og frå skulen på den aktuelle vegen.
– Om vi får ein gangsti innover Hamremyra ein gang i framtida så vil jo mykje av dette vere løyst, men før vi får den så bør ein ikkje auke fartsgrensa. Så dette er noko vi i FAU kjem til å ta tak i, avsluttar Flølo.
Når ein ikkje er mange nok til å vere trygge
Har ordføraren med på laget
Ein annan som reagerer på dei nemnde planane er Stad-ordførar Gunnar Silden (V).
– Eg vil seie at det er galskap å endre farta til ei 80-sone så tett opp til skulen. Hadde det vore opp til meg så hadde vi heller hatt 60-sone heile vegen frå sjukeheimen og inn forbi Hammarsvikhaugen, seier han.
I tillegg til at den nye skiltplanen kan gjere skulevegen meir utrygg for born i bygda med tanke på farta, så viser Silden til all den venta auka i aktivitet langs vegane dei komande åra.
– Trafikken har jo allereie auka med arbeidet på det nye helsesenteret. I tillegg er det jo planar for at det skal skje ting på Saramarka som ligg like ved, og om arbeidarane til den komande skipstunnelen skal ha ein brakkerigg, så blir den også truleg i området. Og ikkje minst så blir det høg aktivitet rundt bygginga av eit nytt hotell.
Silden lovar derfor å ta tak i saka.
– Eg jobbar opp imot fylket for å få endra planen. Vi har jo allereie søkt om å få på plass ein gang- og sykkelveg der, så ved å sette opp farta til åtti så gir dei nærast inntrykk av at det ikkje er farleg å gå der, avsluttar Silden.