Leiarartikkelen stod på trykk fredag 26. februar.
Det er flott at politikarane i Eid og Gloppen kommunar har funne tonen, og vil slå seg saman. Men langt ifrå alle er begeistra for at dei vil ta Nordfjord-namnet.
Dette blir ei kommune med rundt 12.000 innbyggjarar. Det er 1/3 av alle i Nordfjord. Det store fleirtalet av nordfjordingane, 2/3, vil bu utanfor Nordfjord kommune. Nordfjord er ei knallsterk merkevare og namnet på ein heil region.
Dette er namnet på ein fjord som alle som bur rundt identifiserer seg med. Alle som bur her, frå ytste Stad til inst i Oldedalen, er og vil alltid vere nordfjordingar. Mange på sørsida av Nordfjord som bur i Bremanger, er også nordfjordingar.
Nordfjord vert også nytta av fleire aktørar utanfor det som no vil bli Nordfjord kommune. Nordfjord Hamn, Nordfjord Vekst, Nordfjordhallen, Nordfjord Kjøtt, Visit Nordfjord. Lista er lang. Sjå berre i Brønnøysundregisteret.
Vi synest dette er ganske fantasilaust. Dette er eit dårleg utgangspunkt for at alle Nordfjord-kommunane skal samarbeide og utvikle seg som ei sterk merkevare og eit felles bu- og arbeidsområde, same korleis dei nye kommunegrensene ser ut.
Det burde vere fleire namn i dei to kommunane som innbyggjarane kan identifisere med, som dei kan vere stolte av og som dei kan kalle seg i framtida. I intensjonsavtalen mellom Vågsøy, Selje og Vanylven har dei blitt samde om eit lokalt unikt namn som dei løfter fram.
Lat oss vere nordfjordingar alle i regionen. Lat oss pynte oss i nordfjordbunadane våre og synge «nasjonalsongen» vår; Nordfjordsongen som før.
Kva er forresten gale med å bruke anten Eid eller Gloppen kommune?