– Kalenderen viser 26. januar og sola skal igjen, etter planen, skine på skulen vår etter ti solmørke veker. Dette blei i dag markert med solfest på skulen med gul bekledning og alle elevar i aksjon med ulike oppdrag knytt til temaet sol, skriv skulen på sine Facebook-sider.
Solproduksjon, funfacts, bokstavdikt, song og dans var berre nokre av aktivitetane som gjekk føre seg rundt om i klassene, før alle samlast til framføring og gul servering på fellessamling i gymsalen.
– Som i fjor glimra sola dessverre med sitt fråvær. Flaks for oss er det at rektor Stig W. Ågedal-Mortensen har bursdag på sjølvaste soldagen og stod for skinning heilt på eiga hand. (Han fekk sjølvsagt bursdagssong og krone som takk), skriv dei.
Sjølv om sola altså ikkje titta fram, finn dei glede i å vite at den no er der – så lenge skyene held seg vekke.
– Sjølv om vi ikkje såg antydning til solglimt heile dagen i dag, så gler vi oss over at sola skin på skuleplassen neste gong ho tittar fram.