Dette kjem fram i eit innlegg på restauranten sin Facebook-side.
– Hei alle saman. Vi har ein viktig ting vi må ta opp. Nokre blir kanskje skuffa, andre blir kan hende glade, men i korte trekk, Aske som vi kjenner det i dag vil snart gå gjennom ein stor forandring, står det innleiingsvis i innlegget.
Leon Knapskog, Silje Øygard, Øyvind Haugland og Espen Sandmark Heia er dei som arbeider på Aske.
Folk flokka til sentrum då Leon endeleg kunne ha gatematfestival igjen
At «livet kjem i vegen» for fleire av dei, gjer at dei no har måtte ta eit val.
– Mykje har jo skjedd med oss som driv denne plassen allereie. Silje har flytta til Bergen. Espen har to ungar som spring rundt. Leon bur deler av året i Spania og frå neste år av skal Øyvind bu deler av året i Lofoten. Dette gjer at det blir vanskeleg å drive på same måte som vi har gjort de siste åra. I tillegg treng vi alle betre balanse mellom jobb og privatliv, skriv dei.
Valet dei har enda på handlar om å gjere om på menyen for å gjere den enklare å handtere i kombinasjon med travle dagar privat. Det blir også gjort eit poeng utav at folk sine matvanar har endra seg ein del.
– Vi ser også at færre kan prioritere å gå ut å ete like ofte som før, og det at vi bruker lang tid på å lage nye retter kvar veke er ikkje lenger økonomisk forsvarleg. Vi har komne fram til et konsept vi trur vil fungere veldig bra både for oss og Eid. Det vil kunne leve i lang tid framover, krevje færre arbeidstimar, få investeringar og ikkje minst er det noko vi alle er utruleg begeistra for! Aske vil bli et reindyrka burgarkonsept, skriv dei.
Restauranten som ein kjenner vil halde opent som vanleg ein månads tid til. Den siste serveringa blir under årets Operaveker.
– Etter det held vi stengt ein vekes tid for å pusse opp og gjere klart lanseringa av «Aske Burgarbar». Tusen takk til alle våre flotte gjester, håper de blir med oss på neste kapittel også, avsluttar dei innlegget.