– Det har vore eit trafikkuhell mellom ein lastebil og ein minicrossar ved Seljetun i Florø. Ein minicrossar med ein eldre førar velta, men det er ikkje meldt om alvorlege personskadar, opplyser operasjonsleiar i Vest politidistrikt klokka 12.58 tysdag.
Politi var då på staden.
Om lag ein time seinare kom Vest politidistrikt med ei oppdatering.
– Førar av minicrossar, mann i 80-åra, vart sett til av helsepersonell på staden, opplyser politiet, som legg til at mannen ikkje vart skadd i trafikkuhellet.
Ifølge operasjonsleiar er det ikkje mistanke om rus hos nokre av dei involverte.
– Patruljen opprettar sak, fortel operasjonsleiar.
Det vart ikkje gjort førarkortbeslag i samband med trafikkuhellet.