Tysdag morgon klokka 07.33 opplyste Vegtrafikksentralen vest at rv. 15 over Strynefjellet framleis er stengt.
– Det er fare for snøskred og vegen er stengt. Merk at sluttida er usikker og kan bli endra, opplyser Statens vegvesen i ei trafikkmelding på nettstaden sin.
Klokka 10.41 tysdag opplyste Vegtrafikksentralen at Strynefjellet er opna for normal trafikk etter skredkontroll.
Det er vinterferie og nokre set seg kanskje i bilen for å reise på tur i morgontimane tysdag. Det er då lurt å vere merksam på køyreforholda i området.
Tidleg tysdag morgon blei det nemleg meldt om glatte vegar i Stryn-området i samband med eit trafikkuhell ved Nedstryn kyrkje.
– Ein bil har hamna i grøfta. Det skal vere ein person i bilen, men det skal ikkje vere alvorleg personskade. Det er meldt at det er glatt vegbane, opplyste operasjonsleiar i Vest politidistrikt klokka 06.16.
Ulykka skal ha skjedd ti minutt tidlegare og politiet opplyste om at dei var på veg til staden.