– Om nokon seier at næringslivet i Måløy er kjedeleg veit dei ikkje kva dei pratar om, seier Elise Silden som er marketing assistant i Babord.
Ho var ein av føredragshaldarane saman med søster og lærar Camilla. I tillegg var yngste søster i flokken, Mette Silden, også til stades som påmeldt på arrangementet.
Viste fram moglegheitene
Torsdag 5. oktober arrangerte Måløy Vekst Måløytreff i Bergen. Tanken er at vekstselskapet tar med seg lokale bedrifter til Bergen for å vise fram moglegheitene som finst i næringslivet og arbeidslivet i Måløy. Denne gangen hadde Måløy Vekst med seg Ervik havfiske-gruppa, Babord, Selstad, Kinn kommune og PwC.
– Ekstra kjekt var det at Kinn kommune stilte med to representantar, både kreftsjukepleiar Elise Sandvik og lærar Camilla Silden. Det er flott å få vist fram eit vidt spekter av moglegheiter, seier Seline Larsen som er kommunikasjonsrådgjevar i Måløy Vekst
Alle bedriftene som deltok har eit rekrutteringsbehov, men ikkje alle har lyst ut ledige stillingar.
– Ta opp telefonen og ring bedrifta du er interessert i, eller send ein e-post. Ein ting er sikkert, og det er at alle er interesserte i å snakke med dykk og ein bit ikkje i andre enden, oppmodar Marcus Vangberg, PwC Nordvest
Inkluderer nok ein by
Det var om lag 50 personar som møtte på arrangementet, som fann stad på Kulturhuset i Bergen. Her var det både måløyværingar og personar med tilknyting til Måløy, men også personar som hadde spesiell interesse for ei eller fleire av bedriftene som var til stades.
– Det er veldig kjekt å sjå at dei påmelde viser interesse for moglegheitene i Måløy, og vi oppfattar at måløytreffa fungerer svært godt for å komme i kontakt og halde kontakten særleg med måløyværingar som har flytta vekk for å studere, seier Larsen i Måløy Vekst.
Vekstselskapet er svært nøgde med gjennomføringa av arrangementet i Bergen, og dei har også hatt god erfaring med å arrangere Måløytreff i Ålesund. No tar dei med seg konseptet til Trondheim, truleg i løpet av november.