– Vi har skipa til denne lunsjen på skulen i over ti år. Det er ein god tradisjon som både vi og elevane gler oss til. Ei positiv samling. Ungane er så eksemplariske. Vi tek sikte på å arrangere neste år også, seier leiar Marit Nore Sørhaug i sanitetsforeininga.

For berre timar etter at lunsjen var over, kom beskjeden om at Bryggja Skule AS har fått godkjenning for drift av privatskule frå hausten.

– Bryggja Skule AS har i dag fått konsesjon med Undervisningsdirektoratet til å drive privatskule på Bryggja. Vi tek med det sikte på å kunne starte opp skule frå august 2018, opplyste dagleg leiar Sverre Solibakke fredag ettermiddag.

Den kommunale skulen på Bryggja vert lagt ned når Vågsøy-skula tek sommarferie denne veka og dei rundt 40 elevane skulle etter planen gå vidare til enten Skavøypoll skule, Stårheim skule eller Kjølsdalen Montessoriskule.

Dagleg leiar Sverre Solibakke opplyser at ein stad mellom 35–40 elevar vil gå på privatskolen på Bryggja når den opnar dørene til hausten.

– Vi jobbar nå med å få på plass nødvendige lærarkrefter. Nokre er allereie på plass, seier Solibakke, som forklarar at de vil bruke skulebygget samt grendehuset til kroppsøving.

Fredag var i stemninga stor då sanitetsforeininga hadde dekt på borda i grendehuset.

– Eg åt eit rundstykke med pølse. Så åt eg ei drue og litt eple. Til drikke fekk eg kakao og juice. Vanlegvis brukar eg å ha skive med leverpostei og agurk som niste, og polarbrød med bringebærsyltetøy. Men det er endå betre når vi får det her. Vi gler oss alltid til denne lunsjen, seier Jonas Hessevik.

– Vi går i 5.-klasse og har vore med på lunsjen kvart år. Det er veldig stas. Vi slepp å ta med niste og så får vi kakao å drikke for ein gong skuld, seier Frida Kvalheim og Silje Kassen.

Marit Nore Sørhaug understrekar at kakaoen er unntaket.

– Vi serverer sunn mat med grove rundstykke med godt pålegg, mjølk og juice til drikke og med frukt og grønsaker.

Lærar Tony Jurgensen seier at det no er opp til styret ved den private skulen å leggje premissane for neste år.

– Vi har førebudd elevane for komande skuleår ved at dei har vore på besøk på den skulen dei har søkt seg til. Det har vore stor risiko for at dei ville bli spreidd på tre skular, og det ville vere veldig synd. Det er ein god eksisterande skulekultur som då blir oppløyst. Mellom anna er vi den skulen i kommunen som har jobba lengst med PALS, eit program for korleis vi vaksne møter ungane. Dette er no innført i alle skulane i Vågsøy.

Det er om lag ti arbeidsplassar på skulen, av dei 6,5 pedagogar. Jurgensen fortel at det er uvisse også blant dei.

– Vi med fast tilsetting er tilsett i Vågsøy kommune og får jobb andre stader. Sjølv skal eg til Skavøypoll til hausten. Vi har oppseiingstid så det er ikkje beint fram berre å hoppe over til ein ny arbeidsgjevar.