Ei prosjektgruppe der det er teikn til stor optimisme.
– Vi er veldig optimistiske. No gler vi oss berre til å få ei tilbakemelding frå kommunen og å kunne presentere planane våre på ein skikkeleg måte, seier Kristoffer Hove som sit i prosjektgruppa for Selje idrettslag.
Om optimisten Hove får rett, kan det nemleg bli byggestart av ein ny kombinert svømme- og fleirbrukshall allereie neste år. Opning kan då bli året etter, i 2025.
Vil gi kommunen eit tilbod dei ikkje kan seie nei til
– Eit unikt prosjekt
Bakgrunnen for denne optimismen er at han og resten av prosjektgruppa rett og slett ikkje kan sjå kva kommunen kan seie nei til.
– Dette er eit storslått og heilt unikt prosjekt for kommunen, og ikkje minst for heile ytre. Her kan vi få på plass to svært etterlengta og ønska prosjekt, utan at kommunen skal måtte betale noko meir enn dei allereie har vedtatt å betale for ein ny svømmehall ved Selje skule. Dei får eit tilbod som nesten er for godt til å vere sant, seier han.
At tilbodet nyleg også har blitt enda betre enn det opphavlege gir han om mogleg større grunn til optimisme.
– Tidlegare i planen så låg det inne eit basseng på 12,5 meter. Men etter å ha finjustert og pussa på tala så ser vi eit basseng på 25 meter vil koste netto tilnærma det same i etablering. Det er fordi dei ekstra etableringskostnadane fullt ut vert dekte av auka spelemiddeltilskot. I tillegg vil auka driftsinntekter utlikne dei auka driftskostnadane. Då ynskjer vi å vere framoverlent og presenterer eit 25 meters basseng som løysing, seier han.
Er ferdig med saka i denne omgang: Vil ha svømmebassenget på skuleområdet
Har aldri sett eit så godt dokumentert prosjekt
Selje idrettslag gjekk tidleg ut og omtala prosjektet som eit prosjekt for heile ytre Stad. I dette ligg det eit ønske om å samarbeide med dei to andre idrettslaga i gamle Selje kommune, Stadlandet og Flatraket idrettslag.
Nyleg blei det kjent at sistnemnde idrettslag, ved Stig Ødegård, går inn i prosjektgruppa.
– Dette prosjektet har imponert meg stort. Eg trur eg aldri har sett eit forprosjekt som er så godt dokumentert og planlagt, seier han.
Også han trur at prosjektet er noko som kommunen ikkje kan la vere å bli med på.
– Eg vil påstå at dette er eit tilbod som det skal bli svært vanskeleg for politikarane å seie nei til. Kommunen skal garantere for eit lån og forskottere spelemidlar. I tillegg signerer dei avtale om bruk av symjebassenget som svarar til investering og driftskostnader av eit opplæringsbasseng ved Selje Skule, seier han.
– Gevinsten er ein Fleirbrukshall med scene og kulturdel, og eit 25 meter basseng. Det er synd at barna i ytre del av kommunen skal vekse opp utan desse tilboda, og eg håpar politikarane grip denne moglegheita, held han fram.
Vil gjerne ha med Stadlandet også
Ifølge Kristoffer Hove i prosjektgruppa står også døra på gløtt for at Stadlandet idrettslag kan bli ein del av prosjektet.
– Vi er opne for at også dei kan vere med i prosjektet. No veit vi jo at dei ønsker å realisere sitt eige prosjekt, enten ein større gymsal eller ein eigen hall. Det forstår vi med all den aktiviteten dei har der ute. Og ingenting hadde vore betre enn det kjem noko både her og der, men skal ein bygge ein fleirbrukshall med kommunale midlar i ytre så bør den ligge i Selje med tanke på geografien, seier han.
I dette får han medhald av Stig Ødegård i Flatraket idrettslag.
– Det må vere ei målsetting at vi får ein større idrettshall i ytre. På Nordfjordeid har dei ein hall som seks skular delar på. Då må det vere mogleg at tre skular i ytre delar på ein. Så målet er at vi må få til eit samarbeid med Stadlandet idrettslag, seier han.
Blir eventuelt ein styresak
Om og viss det kjem ein invitasjon frå Selje idrettslag, er det noko som styret må ta stilling til fortel leiar i Stadlandet idrettslag, Margareth Olin Leivdal.
– Men det er ikkje noko vi har fokus på no. Vårt fokus er å utvikle den veksten og det behovet vi har der vi bur og der ungane våre er aktive. Vi hadde ein dialog med Selje idrettslag for nokre år sidan, men sidan den gang så har mykje skjedd. No er vi godt over 300 medlemmar og har hatt ei stor auke i aktivitetane. Så vi har eit heilt anna behov no enn då, seier ho.
Idrettslaget merkar veksten i bygda – stor pågang til fleire nye tilbod
Kommunen har ikkje sett seg inn i saka enno
20. juni sende Selje idrettslag ein invitasjonen til Stad kommune om å inngå eit samarbeid for å realisere ny svømme- og idrettshall på Saramarka i Selje.
– Vi har svart at vi har teke imot brevet, og eg har og hatt ein telefonsamtale med styreleiar i Selje idrettslag, Marilyn Osmundsvåg. Vi har avtale eit møte i august. Noko meir enn det har eg ikkje å seie. Dette blir ein politisk sak, seier assisterande kommunedirektør i Stad kommune, Kristine Dahl, til Fjordenes Tidende.
– Skal saka då opp i det første kommunestyremøtet i september?
– Først må vi ha eit møte internt og legge ein plan for korleis vi skal behandle invitasjonen. Vi har enno ikkje fordelt saka til sakshandsamar då saka kom rett før ferien, seier ho.