Asbjørn Hagen frå Eid og Kristiane Rusten Ekremsæter frå Fiskå vart i dag tildelt Draumestipendet på 10.000 kroner frå Norsk Tipping og Norsk kulturskuleråd.
Hagen er ein av fem vinnarar i Sogn og Fjordane, og Rusten Ekremsæter ein av ni vinnarar i Møre og Romsdal. Totalt blir det delt ut ein million kroner fordelt på 100 nominerte kandidatar i alderen 13 til 20 år.
Desse er nominerte
– Min største draum er å kunne leve av å spele teater. Anten som filmskodespelar, musikalartist eller som tradisjonell skodespelar ved eit av dei store teatera, skreiv Hagen i søknaden til Draumestipendet.
Eidaren understrekar at det å stå på ei scene gjev han ei spesiell kjensle.
– Det å kunne stå framfor eit publikum og skape noko som rører ved tankane og kjenslene til menneska som sit framfor deg, er heilt spesielt. Samtidig er noko av det eg set mest pris på med teater at eg kan spele nokon som ikkje er meg sjølv, skriv han, og legg til:
Trekte fire fulle hus
Hagen har det siste året gått på Romerike Folkehøgskule på lina for musikkteater, og har budd seg til opptaksprøver ved Norges Teaterhøgskule.
– Draumestipendet er derfor ei god hjelp på vegen mot målet mitt slik at eg kan utvikle meg vidare og få moglegheita til å drive med det eg elskar mest. Og på den måten kan eg kanskje vere med på å gi noko tilbake til samfunnet gjennom arbeidet mitt, skreiv han i søknaden.
Rusten Ekremsæter går siste året på Myklebust ungdomsskule og har planar om å søkje på musikklina ved Volda vidaregåande skule til neste år.
– Song og musikk har alltid vore ein viktig del av livet mitt. Vi har alltid sunge mykje heime, og eg byrja i barnekor før eg fylte tre år, skriv ho i søknaden til Draumestipendet.
Songaren har sunge på Ivar Aasen-tunet med kronprins Håkon som tilskodar og har sunge ilag med Tone Damli.
– Eg er eigentleg ei ganske sjenert jente, med ein stor porsjon sceneskrekk. Men den kjensla eg sit igjen med etter ein vellukka opptreden er berre fantastisk. Det er noko magisk ved det å stå på ei scene på sitt mest sårbare, skriv Rusten Ekremsæter, og legg til: – Noko eg alltid har hatt veldig lyst til, er å få prøve meg i ein musikal, eg har òg ein draum om ein dag å få lage og spele inn eigen musikk. Om eg skulle vere så heldig å bli tildelt Draumestipendet, ville eg ha brukt mesteparten av pengane på utstyr eg treng for å kunne oppfylle denne draumen.
Tildelingar i Sogn og Fjordane:
Eid: Asbjørn Hagen - Teater
Fjaler: Tormod Skår Midtbø - Dans
Førde: Kristina Fransson - Musikk
Gloppen: Sofia Hyttedalen - Musikk
Luster: Sindre Steig - Musikk
Tildelingar i Møre og Romsdal
Gjemnes: Nikolai Gagnat - Musikk
Molde: Marthe Grøtta Øther - Visuell kunst
Molde: Selma Linnea Sandvik Fegth - Skapende skriving
Nesset: Håvard Bævre Ellingsgård - Visuell kunst
Rindal: Mali Evjen - Visuell kunst
Sula: Ivar Trengereid - Visuell kunst
Vanylven: Kristiane Rusten Ekremsæter - Musikk
Ålesund: Fride Snipsøyr Holøs - Teater
Ålesund: Nathalie Marie Fausa - Annet