Fem sjukepleiarar på Stad meiner både bygda, næringslivet og det helsefaglege miljøet vil tape stort om legekontoret blir lagt ned permanent.
Dei fem sjukepleiarar i heimesjukepleien på Stad tek no bladet frå munnen for å minne politikarane på betydinga av legekontoret.
No vil næringslivet bla opp pengar
– Alle politiske parti hadde to legekontor i sitt partiprogram. Betydinga har blitt forsterka dei vekene vi no har vore utan, seier dei fem, som presiserer at dei står samla om denne saka.
Trivst i jobbane
Alle fem meiner Selje kommune er ein god arbeidsgjevar.
– Vi trivst veldig godt i jobben, både i sone nord og sør, seier Ragnhild Sjåstad. Men dei klarer ikkje å stå på sidelinja og sjå at nok eit tilbod forsvinn. Det vil få negative konsekvensar, meiner dei.
Nektar å gi opp kampen
– Det blir argumentert med at samling styrker fagmilljøet i Selje. Men vi som jobbar her på Stad vil jo tape vårt fagmiljø, seier Jørgine Dalsbø. For det er på legekontoret lokalt at heimesjukepleiarane får sin faglege dialog og gjensidig hjelp og støtte.
– Folk skal no bu lengst muleg heime. Det krev nært samarbeid mellom faggruppene. All kommunikasjon kan ikkje skje per e-post eller telefon.
Ute i bygdene
Heimesjukepleien er også ofte ute i bygdene og tek blodprøver og andre prøver som dei leverer doktorkontoret.
– Dette gjer vi fordi mange eldre og sjuke har problem med å forflytte seg. Og no legg samhandlingsreforma opp til ei auke i nettopp prøvetaking i heimen, seier Hanne Teige.
Laboratoriearbeidet må så utførast av kyndig personell på eigna stad.
– Dette har vi verken tid eller kompetanse til. Vi kan heller ikkje køyre heilt til Selje med blodprøver frå dei ytterste vikene. Prøvene må vere levert innan to timar, seier ho.
Anne Lise Drage hugsar dr. Lexner som i lokalavisa i 2012 påpeikte den dårleg samfunnsøkonomien i det å tvinge alle sjuke og eldre på Stad til Selje i staden for at ein lege reiser andre vegen.
Saman med kollegaene manar ho til bruk av fornuft:
– La oss ilag snu fråflyttings-trenden. Starten kan vere å behalde legekontoret på Stad. Eit viktig signal til dei unge.