Vågsøy har ikkje vore med i eit destinasjonsselskap sidan i fjor vår. Ordførar Kristin Maurstad (Ap) meiner ein no må ta stilling til om kommunen skal vere med i eit reiselivssamarbeid.
– Eg har kalla inn Visit Nordfjord og Visit Fjordkysten til to ulike formannskapsmøte, i løpet av oktober, slik at dei kan orientere politikarane om arbeidet sitt. Eg meiner det er viktig at kommunestyret tar med seg denne vurderinga inn i budsjettarbeidet, for det er ein kostnad knytt til å gå inn i eit slikt samarbeid, seier Maurstad, som samstundes peikar på at den framtidige kommunestrukturen kan ha noko å seie for ei slik avgjerd.
Ber reiselivet lære av sjømatnæringa
Det var i fjor vår at eit samrøystes kommunestyre gjekk inn for å avslutte samarbeidet med Visit Nordfjord (då Reisemål Stryn og Nordfjord). Den gong vart det av rådmann Knut Ove Leite, peika på at av dei ti medlemsbedriftene i kommunen så var to inaktive, medan ytterlegare to selskap var registrert i nabokommunane. I tillegg var det snakk om å etablere eit felles destinasjonsselskap for Nordfjord og Sunnmøre, noko som ville medført 80.000 kroner i auka utgifter for Vågsøy.
Maurstad fortel at ein i vedtaket også var samde om at ein skulle sjå på alternative løysingar for reiselivet, noko ein no er i gong med.
– Samstundes som vi ikkje har vore medlem i Visit Nordfjord har vi hatt mykje med destinasjonsselskapet å gjere via Nordfjord Vekst og Nordfjordrådet. Hovudpoenget og ein del av grunnen til utmeldinga var at vi ikkje har dei store reiselivsaktørane i kommunen som er med. Det er ikkje kommunen åleine som skal drive utvikling, det er viktig at aktørane sjølve er sterkt med, seier ordføraren.
Skal selje det faktum at vi har det meste
– Det handlar om å bli profilert saman med resten av regionen, og om å vere ein del av ein større samanheng, seier ho, og legg til:
– Eg vart veldig imponert over den nye profilen til Visit Nordfjord, men Visit Fjordkysten har også mange spanande prosjekt på gang.