– Dirigenten vår seier at stykket sit som det skal, men det krev fullt fokus og at vi gjer det vi har øvd på, seier leiar i Kjølsdalen Musikklag, Anne-Britt Dypveit.
Torsdag dreg musikklaget til Bergen, og fredag sit dei på scena i Peer Gynt-salen i Grieg-hallen.
For korpset frå Kjølsdalen er det ikkje så viktig korleis det går i konkurransen.
– For oss handlar det mindre om prestasjonen, og meir om vegen dit, reisa vi har hatt saman med dirigent Arvid Anthun, seier Dypveit, som forklarer at deltakinga i NM er eit middel for dei til å bli betre.
– Viss vi går på scena og føler vi har har gjort vårt beste, at det gjekk bra, så er målet nådd, seier ho, og legg til:
– Og så får vi sjå kva plassering det fører til.
To år sidan sist
Kjølsdalen Musikklag har deltatt i NM for brassband fleire gonger før. Sist for to år sidan. Det er krevjande for korpset å gjere det, men dei likar å strekke seg.
– Vi stiller i det som kallast 5. divisjon, men det er likevel ikkje berre-berre for oss. Det betyr ekstra jobbing, innsats og øving. Og det er ei avgjerd korpset tar saman, seier Dypveit, som fortel at det spesielt er dei yngre i musikklaget som har ivra for å reise.
– Ja, dei hadde verkeleg lyst til det. Dei gler seg veldig.
Kjølsdalen Musikklag, som tel 29 medlemmer totalt, har heile ti medlemmer i skulekorpsalder, noko dei er veldig glade for.
– Og no skal fleire av desse vere med på NM for første gang. Det er kjempefint at det kjem inn yngre folk som har lyst å øve meir og få større utfordringar, seier Dypveit.
Fornøgd med øving
Orkanen Tor sette stoppar for øvinga fredag, men korpset fekk ei god gjennomkøyring både laurdag og søndag.
Slik starta dei det nye musikkåret
– Vi trur det sit som det skal. Dirigenten vår seier i alle fall det. Det krev fullt fokus og at vi gjer det vi har øvd på, men det føles bra!
Kjølsdalen Musikklag deltar i 5. divisjon med 11 andre korps. Frå våre kommunar skal Flora-Bremanger brassband skal også delta, men dei deltek i 3. divisjon.