Stiftinga Sankta Sunniva, Selja og Stad har valt styre og er formelt stifta.

Det var ei optimistisk stemning på stiftingsmøtet for Stiftinga Sankta Sunniva, Selja og Stad denne veka, ifølgje leiar i arbeidsgruppa Bård Fløde.

– Nær 30 personar møtte og om lag 60 stiftarar hadde teikna seg før og under møtet. Det er tydeleg at her er mange som ser fram til, og har positive forventningar til arbeidet som stiftinga skal gjere, seier han.

Føremålet til stiftinga er formidling, forvaltning og forsking knytt til Selja kloster- og helgenanlegg, Selja og Stad, sett i både lokal, nasjonal og internasjonal samanheng.

Stiftinga skal drive næring og vere vertskap for turistar, pilegrimar og besøkande, bidra til å skape gode opplevingar, og utvikle varige verdiar for lokalsamfunn og næringsliv i området.

Styret består av leiar Liv Stave som også er lokal representant og fylkespolitikar, Gerd Kjellaug Berge og vara Torkjell Djupedal frå Vennar av Selja kloster, vara Beate Vik Hauge i Reisemål Stryn og Nordfjord, økonomisjef Geir Kvisten i kommunen, fylkesvaraordførar Jenny Følling, stortingsrepresentant Sveinung Rotevatn, Dag Jarle Aksnes i NCE Tourism, Helene Maristuen frå Høgskulen i Sogn og Fjordane, Jorunn Sem Fure som er direktør i Telemark Museum, samt lokal representant Jon Frogner. Synnøve Aabrekk i  NCE Tourism er også vara til styret.