– Sjølv i ein alder på godt over 80 år stiller han opp og hjelper der han kan, seier Wenche.
– Vi må jo ha nokon å skryte til
Wenche er hobbyfiskar og set stor pris på Magnus sin kunnskap.
– Han har alltid gode tips og råd til oss hobbyfiskarar, og eg meiner han absolutt fortener ei julestjerne, seier ho og legg til:
– Vi er ivrige hobbyfiskarar begge to, så vi pratar mykje om fangst og fiske. Vi må jo ha nokon å skryte til om kor mykje og kor tung fangst vi har fått. Så vi tar litt bilde som viser tal og vekt, smiler ho.
Ho meiner Magnus er fantastisk og har gode minne frå barndommen med besøk på øya.
– Han har vore ein god venn av familien i alle år, og eg hugsar kor eg gleda meg til å reise til Gangsøy og møte Magnus. Han hadde nemleg alltid ei røvarhistorie på lur. Vi køyrer oss alltid nokre turar til Gangsøy i løpet av somrane no også, og då må vi alltid stikke nedom, seier ho.
Magnus (82) trivst som einaste fastbuande på øya han voks opp: – Her er eg sjølvhjelpt og har fått gjort det eg ville
– Han er eit utruleg godt menneske
Ein annan som berre har positive ting å seie om Magnus er Geir Ove Åsebø. Geir Ove og familien eig gamleskulen på øya som dei har bygd om til feriehus.
– Magnus er den som veit alt om kva som skjer, og han passar på hytter og båtar. Dersom det har vore vind, tar han seg ein tur og sjekkar om alt er som det skal, og dersom det ikkje er det, gir han beskjed.
– Magnus er også levande opptatt av at ein må passe på vegen på Gangsøy. Og viss det er noko han kan gjere på øya, så gjer han det, seier Geir Ove, og legg til:
– Magnus er berre eit utruleg godt menneske. Eg får faktisk ikkje sagt nok godt om den mannen.
Magnus synest det er kjekt å bli sett pris på og takkar veldig for julestjerna då Fjordenes Tidende besøker han heime på Gangsøy.
– Tusen takk. Dette var kjekt. Tusen takk til alle som har stemt meg inn, seier Magnus med eit smil.