– Det hadde vore veldig kjekt å bli Noregs beste stemme, men det er veldig mange flinke med i år, seier Kamilla.
Beste musikkminnet
Det beste musikkminnet til Kamilla er ho eigentleg ikkje så sikker på om er eit minne i det heile tatt. Ho har i alle fall blitt fortalt om det som skjedde mange gongar.
– Det var då onkelen min hadde kjøpt ein mikrofon med stativ i plast til meg. Og det blei eg veldig glad for. Og så stod eg og song framfor heila familien. Eg hadde eit sånn notathefte som eg skulle følge med på, men eg hadde det opp ned. Og eg bladde i veg i opp ned-notatheftet og song, ler ho.
18-åringen verkar så roleg der ho har stått på The Voice-scena dei siste fredagane. Det viser seg at ho har eit lite triks. Kamilla syng ofte utan sko. Og det har ho gjort i The Voice også.
Dette trikset bruker Kamilla (18) for å halde nervøsiteten unna på The Voice-scena
– Eg er eigentleg veldig roleg. Men eg blir veldig nervøs rett før eg skal gå på scena. Men så liker eg å synge utan sko på meg. Og då får eg liksom bakkekontakt. Og då kjennast det ut som eg går inn i ei lita sånn boble. Og det er nok derfor folk synest eg ser så roleg ut.
Og då tenker ho berre på det augeblikket ho er i.
Ho er ikkje sikker på om så mange har lagt merke til at ho syng utan sko.
– Men eg har sjølv sett at eg krøller tærne, ler ho.
Er utåtvendt og sosial
Kamilla liker å le og har ein smittande latter.
– Eg er ei utåtvendt jente som liker å vere i aktivitet og vere saman med vennane mine. Eg er eigentleg ein veldig rastlaus person. Eg går på studiespesialiserande på Eid vidaregåande skule. Eg er russ og med i ei russegruppe saman med ni andre jenter. Og det er så gøy!
Kamilla bur på Hjelle i Stad kommune saman med familien sin. Ho er sjølv midtarst i ein søskenflokk.
– Eg er veldig glad i familien min. Mamma, pappa og så eg har ei storesøster og ein veslebror. Og det er på Hjelle eg finn roa. Det er der eg finn eit pusterom frå alt eigentleg. Det vil alltid vere heime.
At ho er familiekjær kom godt fram i det første The Voice-programmet. Då hadde ho nemleg med seg bestevenninna og … morfaren sin, Rolf.
– Eg er veldig glad i besteforeldra mine og tanter og onklar også. Det var så koseleg at Besten, som er den som har pusha meg til å bli med i The Voice, tok turen og blei med meg på blind audition. Han syntest det var kjempekjekt og dei andre deltakarane sa berre: «Herregud, så gøy at du har med bestefaren din», og så blei han liksom Besten for alle den dagen, ler Kamilla.
– Alle kjenner alle
Men det stoppar ikkje der. Ho skryt også at byggefeltet sitt på Hjelle. Først var det eit lite byggefelt, no er det blitt større. Alle kjenner alle og ho synest det er stas når naboar følger med henne på TV Voice og kommenter til henne at dei har sett på.
Og så innrømmer ho at ho smugkikkar litt på seg sjølv også.
– Då programmet Sofa hadde med reaksjonar på The Voice-sendinga, måtte eg faktisk sjå for å sjekke om eg var med, men det var eg ikkje, smiler ho.
Under den første livesendinga fredag skal åtte deltakarar bli til fire. Det kjenner Kamilla litt på. For ikkje å ha nervar før livesendinga er planen å fylle dagen med aktivitetar og blant anna vere med vennar som kjem frå Nordfjordeid for å heie på henne.
– Det er litt Hannah Montana-liv det her
Viss Kamilla klarer å komme vidare etter livesendinga fredag må ho sjonglere fleire livesendingar med skule, eksamensførebuing og russefeiring.
– Korleis skal du klare å kombinere dette?
– Det er eigentleg eit veldig godt spørsmål. Eg er ikkje sikker sjølv heller på korleis eg skal klare det. Men det blir til at eg tar skule og festdelen når eg er heime og prøver å vere mest mogleg sosial og bli med ut då. Og så roar eg det heilt viss eg blir i Oslo og fokuserer på The Voice i veka her. Det er litt sånn Hannah Montana-liv det her, eit litt sånn dobbeltliv, ler ho.
Elskar å stå på scena
Kamilla har stått masse på scena før ho dukka opp på TV. Ho har fleire gongar stått på scena i Operahuset. Tidlegare i vår var ho ein av fire revysjefar då russen ved skulen sette opp russerevyen Villspor. Men denne gongen ho var ikkje på scena sjølv.
Var ikkje redde for å fornærme rektor og lærarar – strålte av sjølvtillit
– Vi var rundt 30 stykkar og min jobb var blant anna å passe på dei. Mange av dei hadde ikkje stått på ei scene før og eg hadde mange arbeidsoppgåver bak scena og passa også på at dei hadde det komfortabelt.
Ho innrømmer at ho hadde lyst å stå på scena sjølv også.
– Kven har ikkje lyst til å stå på ei scene i Operahuset når ein har sjansen? Men eg blei eigentleg mest stolt over alle som faktisk torde å stå på den scenen. At fleire klarte å gå ut av komfortsona si og at dei stod så støtt som dei gjorde, gjorde meg glad og stolt.
Til hausten skal ho studere og ho håper ho at ho kjem inn på psykologi og psykisk helse i Bergen.
– Men uansett om eg kjem inn der og flyttar dit, er det Hjelle som er heimen min.
Topp tre plassar
I tillegg til å vere glad i familien og vennar, musikk og Hjelle, har Kamilla tre plassar ho liker å vere i Nordfjord.
1. Gildra
– Eg er veldig glad i Gildra og det er ein veldig fin gåtur dit, seier ho om naturmøteplassen ikkje så langt vekk frå Hjelle.
2. Harpefossen
– Eg er veldig glad i Harpefossen når det er vinter og skitid.
3. Kaia på Nordfjordeid
– Det er kjempefint å vere på cruisekaia om sommaren. Du kan ligge og sole deg og du kan bade der. Det er uansett ein fin plass og ein roleg plass å vere når det ikkje er cruisebåtar.
Elevane var ikkje på villspor – fekk salen til å le godt av parodiane på lærarane
Kamilla hadde med seg besten og bestevenninna då ho gjekk vidare i The Voice: – Grin du, besten?
Gikk vidare i duellen: – Jeg er veldig glad for at vi bestemte at du skulle synge på din egen dialekt