– Det er klart at viss Nordfjord skal overleve som ein slagkraftig region, så er vi nøydde til å ha med Kinn i den konstellasjonen på ein eller annan måte. Viss vi ikkje har det, blir vi veldig svake samanlikna med Sunnfjord, Sogn og ikkje minst med Hordaland. Det er umåteleg viktig, også i neste ordførarperiode, at det blir bygd sterke alliansar i Nordfjord. Det blir spennande å sjå kvar Kinn drar dei neste åra, seier Osdal.

Kan ikkje ta alle oppgåvene sjølv

Per i dag er det fleire interkommunale samarbeid der både Vågsøy, Selje og Eid er med. Kinn kommune har sagt at dei ønskjer å ta flest mogleg av dei interkommunale samarbeida tilbake til kommunen.

– Det vi ser no er at det har nok litt festtalepreg. Vi har ei arbeidsgruppe som arbeider med interkommunale samarbeid, så eg skal ikkje forskottere noko, men vi ser at dette er lettare sagt enn gjort. Vi er mykje meir avhengige av mange av desse samarbeida enn vi kanskje ideelt sett såg at vi var. Over natta finn vi ikkje mange ting vi kan kutte, forklarar Maurstad.

Alfred Bjørlo meiner derimot at desse samarbeida har vore ein suksessfaktor i regionen.

– Når ein ser på kommunebarometeret så ser ein i Nordfjord at alle dei store kommunane er blant dei 20 prosent beste i landet. Går ein til Sunnfjord eller Sunnmøre, er enkeltkommunar høgt oppe og mange langt nede. Det har med å gjere at ein har bygd opp felles strukturar. Å få Kinn med på dette samarbeidet kan gje fleire moglegheiter, seier Bjørlo, og legg til:

– Vi har sagt veldig tydeleg i vår intensjonsplan at vi er avhengige av eit breitt interkommunalt samarbeid.

Ein fot i begge leirar

Vågsøy-ordføraren er klar på at det både finst fordelar og utfordringar knytt til at Kinn kommune har ein fot i Sunnfjord og ein i Nordfjord.

– Om ein ser på dei samarbeida ein har i dag, så er det unaturleg og heilt utenkeleg å samarbeide om legevakt i Kinn. Det er ikkje tema å gjere endringar der. Samstundes skal vi snart inn i eit vestlandsfylke der vi i den store samanhengen er veldig små. Då må gamle Sogn og Fjordane posisjonere seg.

Alle dei tre ordførarane er samde om at Stad og Kinn skal samarbeide for å skape ein attraktiv region for tilflytting.

– Veldig mykje handlar om vekst, utvikling og attraktivitet for kommunane. Og det igjen handlar om å skape regionar som er attraktive. Uansett om Måløy ligg i Kinn eller Vågsøy er det viktig for Eid korleis det går med Måløy. Det handlar om å forstå at om det går bra for naboen, så går det bra for ein sjølv, understrekar Bjørlo.

Per i dag er både Vågsøy, Selje og Eid medlemmar av Nordfjordrådet. Samstundes blir det arbeidd med ein strategisk plan for kysten der ordførarane meiner det er naturleg at både Kinn og Stad er med.

– Selje, Vågsøy og Flora er del av denne i dag. Så det vil vere naturleg at Kinn og Stad er med når den konstellasjonen kjem opp. Dette er riktig nok ikkje eit regionråd, men ein utviklingsarena for kystsaker. Vi har mange felles mål og strategiar på det marine og maritime, seier Vågsøy-ordføraren, og legg til:

– Det er viktig at vi overfører samarbeida til dei som kjem etter oss. Vi kan ikkje styre inn i evigheita, men det å lære av historia tar ein ikkje skade av.

Opplever samanslåinga ulikt

Medan det er lite diskusjonar knytt til nye Stad kommune, går debatten framleis varmt om Kinn.

– Det går av og til litt misunning i meg når eg ser på andre samanslåingar der det verkar til å gå på skjener. Til og med i Sogn, der det var tvangsvedtak, ser det ut som det går rolegare føre seg. Det kan vere at her i Vågsøy har alle konfliktane blitt tatt ut, seier ordførar Kristin Maurstad (Ap) om debatten.

I nabokommunane har det gått rolegare for seg. Dei to ordførarane trur det handlar om ein godt forankra prosess.

– I Eid har ein i befolkninga og det politiske miljøet vore positive til samanslåing. Prosessen med Selje kom brått, men samstundes har det vore forankra at ein har vore positive til større kommunar, seier ordførar Alfred (V) Bjørlo i Eid.

– For Selje sin del hadde vi tvangsvedtaket hengande over oss, noko som gjorde at vi tok styring på prosessen. Eg opplever at nordfjordsporet er viktig for seljeværingane. Samstundes er Eid ein naturleg plass å søke til med tanke på handel og andre tenester. Men det skal seiast at mange i Selje er litt «såre» over at vi ikkje fekk med Vågsøy, seier Selje-ordførar Stein Robert Osdal (KrF).

Har ikkje stengt døra for andre

Leiaren i fellesnemnda for Stad kommune seier dei vil vere opne for at andre kommunar kan kome inn i samanslåinga.

– Stad kommune er ikkje stor nok til å handtere dei interkommunale oppgåvene aleine. Det er eit ønske om regionforstørring. Kva som skjer i framtida er vanskeleg å spå, men på generell basis kan vi vere opne for at andre kommunar kan kome inn, seier Stein Robert Osdal, leiar i fellesnemnda for Stad.

11. juni blir det halde rådgjevande folkerøysting i Kinn. Vågsøy-ordførar Kristin Maurstad (Ap) vil ikkje spekulere i utfallet av denne.

– Det er vanskeleg å spekulere i kva kommunestyret og eventuelt Stortinget vil gjere. Eg trur vi berre må vente og sjå kva resultatet blir, seier ho.

Under den rådgjevande folkerøystinga har innbyggjarane følgjande alternativ: ja til Kinn kommune, nei til Kinn kommune, blank eller veit ikkje.

– Då vi bestemte oss for alternativ til folkerøystinga tok vi ikkje med alternativ om andre konstellasjonar. Per i dag finst det ikkje andre alternativ. Eg trur ikkje vi har sett det endelege kommunekartet. Det som er sikkert er at aleinegang ikkje blir enklare, seier Maurstad.