– Trafikkulykke mellom to bilar. Ein bil tatt fyr etter kollisjonen. Naudetatane er på veg, opplyste politiet sin operasjonssentral.

Klokka 23.04 sa vaktkommandør ved 110 Vest til NRK Vestland at dei hadde fått kontroll på brannen, men at dei ikkje hadde oversikt over om alle var ute av køyretøyet.

Klokka 23.01 melde 110-sentralen at brannen er sløkt.

Ifølge Bergens Tidende skal tilskodarar på staden ha blitt bedt om å trekke unna på grunn av giftig røyk. Dei involverte i ulykka var klokka 23.14 framleis ikkje gjort greie for.

– Det står fram som ei alvorleg ulykke, sa vaktkommandør ved 110 Vest til BT.

Vegtrafikksentralen opplyste at rv. 5 Skudalsvegen ved Hjortevika, like aust for Gaddevågen bru, er er stengt på grunn av ulykka. Det er ikkje passasje på staden. Omkøyring er via fv. 5704 Brandsøyvegen.

– Skadestaden vil bli verande stengt i ein lengre periode inntil alle undersøkingar er gjort, og publikum bør planlegge for å bruke alternative køyreruter fram til i laurdag ettermiddag, opplyser politiadvokat Ole Vallestad Emmerhoff i Vest politidistrikt.

Fem personar i bilane til saman

Klokka 23.30 oppdaterte politiet med noko meir informasjon.

Det var to bilar involvert med til saman fem personar.

– Dei to som var i den eine bilen vart frakta til sentralsjukehuset i Førde med ukjent skadeomfang, opplyste operasjonsleiar.

Her var det snakk om ein mann i 50-åra og ei kvinne i 40-åra.

– Begge var bevisste og lettare skadd.

I den andre bilen var det tre personar.

– Denne bilen er utbrent. Brannen er sløkt, men naudetatane arbeidar på staden. Det er store materielle skadar på bilane, seier operasjonsleiar som fortel at årsaka til hendinga er ukjent.

Politiet opplyser ikkje noko om helsetilstanden til dei som var i bilen som tok fyr.

Ved midnatt var vegen framleis stengt på staden.