–Når det gjeld etablering av fartsdumpar, så er det mange omsyn ein må ta. Vi har bustadfelt på Bryggja, Almenning, Tennebø, Blålida, Ivahavet, Kulen, Måløy, Vågsvåg, Raudeberg og Kvalheim – og spørsmålet er då om ein skal montere fartsdumpar ein plass og gi blaffen i dei andre, seier Odd Henning Svoren, fagleiar på veg i Vågsøy kommune.
Foreldre krev fartsdumpar
Odd Henning Svoren viser til at det også er andre bustadfelt som har uttrykt behov for fartsdumpar, og han meiner at fartsdumpar må komme på bakgrunn av ei heilskapleg vurdering i kommunen. For å montere fartsdumpar må ein følgje Statens vegvesen sitt regelverk, som mellom anna seier at det skal vere 75 meter mellom kvar fartsdump, ifølgje Svoren.
Kostnad for ein fartsdump ligg på cirka 20.000 kroner.
– Det må vere eit eige investeringsprosjekt. Berre i Måløy har vi 14 kilometer med veg, så kan ein rekne sjølve om ein skal montere fartsdumpar på kvar 75 meter, seier han.
Per dags dato så er det berre Øvrevegen på Raudeberg som har fartsdumpar, og desse blei montert for over 30 år sidan.
Skal skaffe seg eit grunnlag
Fartsmålaren på Kulen skal stå i ein månad for å skaffe nødvendig statistikk.
– Først og fremst så må vi skaffe oss eit grunnlag for trafikken på Kulen, seier Odd Henning Svoren i Vågsøy kommune.
Fartsmålaren blei sett opp i starten juli og skal stå ut månaden.
– Og då vil eg gjere som eg har gjort før – dersom det er urovekkande tal på maksfart eller gjennomsnittsfart, så vil eg overlevere det til politiet. Det blir spennande å sjå om det er som dei seier.
Fartsmålaren har vore plassert på Kulen to gongar før, og Svoren fortel at det ikkje blei gjort urovekkande funn då.
– Ein vil alltid oppleve at nokon ikkje respekterer farta.
– Kan det vere at folk slakkar ned når dei ser målaren?
–Ja, definitivt. Alle plassar den har vore før viser seg å gi ei langtidseffekt. Folk har blitt bevisstgjort på farten dei har hatt og har i større grad enn før respektert fartsgrensa, seier Svoren, og legg til at kva som er rett plassering av fartsmålaren sjølvsagt kan diskuterast.
– Men ein må ta høgde for kurvatur og høgde, forklarar han.