Gunnar Silden, som sit i generalforsaminga til Sparebanken Vest, er ikkje nøgd med å høyre at banken no legg ned Selje sin einaste bank.
– Vi er vande med å ha bank i Selje. Eg lurer på om eg har høyrt at vi har hatt bank her sidan seint på 1800-talet. Så dette kjem vi til å merke, seier Silden.
Her blir banken snart stengd
Han er eigentleg ikkje overraska over at nyheita om nedlegginga kjem, men han er overraska over at den kom såpass fort.
– Vi veit jo at besøket i bankane går ned, men eg hadde kanskje trudd at dei ville vente til dei såg korleis den nye kommunestrukturen ville bli sjåande ut, seier han, og legg til:
– Eg har nemleg inntrykk av at dette er ein godt drive bank.
– Vil du ta dette opp i generalforsamlinga?
– Ja, eg tenkjer eg bør seie noko om dette når saka skal behandlast. At eg får prøve å føre fram bodskapen om at ein kommune bør ha ein bank. Og fem arbeidsplassar er også mykje i ein liten kommune.
Er i dialog med banken om å tenke nytt
Han tenkjer også på andre brukargrupper, som dei eldre.
– Her er ikkje alle like digitale som dei yngre heilt enno. Dei går i banken, kor skal dei gå no, spør han.