Når vi brukar søkefunksjonen på fjt.no og skriv inn søkeorda «hærverk» eller «skadeverk» ser ein at dette dessverre er utbreidd i vårt distrikt. Vi kan lese om ruteknusing, bossbøtte sett i brann, bossdunkar slengt rundt, øydelagde dører og veggar på nyoppussa bygg, opprivne plantar og meir. Felles for desse hendingane er at politiet ber om tips for å kunne kome vidare i etterforskinga av desse lovbrota.

Hærverk, eller skadeverk som er det brukte juridiske omgrepet, er ulovleg. Å gjere skadeverk på andre sin eigedom med vilje, kan etter straffelova bli straffa med bøter eller fengsel inntil eitt år. Dessverre er det sjeldan vi høyrer at politiet har tatt dei som har gjort hærverka, og at dei skuldige har fått si straff og gjort opp for seg.

Når ein les om eit hærverk kan det vere fort at ein førehandsdømmer ei gruppe som ein meiner står bak ugjerningane. Då er det viktig å minne kvarandre om at bak ei kvar handling står det eit individ som gjer dette åleine eller saman med andre individ. Vedkomande har tatt eit val, og i dette tilfellet eit dårleg val. Dette valet kan få konsekvensar for vedkomande, men får det ikkje noko etterspel, er det nok store sjansar for personen gjer feil val fleire gongar.

Hærverk er eit samfunnsproblem. Heile samfunnet tapar på at nokon utøver hærverk. Ikkje berre blir det mindre triveleg rundt oss, men det kan også føre til at dei som legg ned ein stor innsats for fellesskapen rett og slett ikkje orkar meir.

Etter eit av hærverka uttaler politiet følgande: «Om du ser noko eller veit noko, sei frå. Om ein melder frå til politiet, så kan vi få gjort noko. Utan tips eller nokon som har observert noko kan det vere vanskeleg i slike saker.»

Politiet må prioritere etterforskinga av hærverk, men alle må aktivt bidra med både førebygging, gode haldingar og melde ifrå om vi er vitne til hærverk.