– Nanda fortener merksemd og ein takk for engasjementet ho legg ned for alle rundt seg, og eg meiner ho er ein verdig mottakar av ei julestjerne, seier Belinda, og held fram:
– Ho viser oss at ting ikkje alltid må vere slik det har vore. Ho er heller ikkje den som sitt i ro når ho noko opplevast urettferdig. For at dei unge skal kome opp og fram, må rammene vere på plass. Ho er sterkt engasjert i bassengsaka og er den som har gått føre og organisert både fakkeltog og folkemøte i parken.
Belinda viser vidare til at Nanda har eit stort hjarte for barn og unge.
– Ho er god på å møte dei unge på dei unge sine premissar. Ho brenn for møteplassar for ungdom og var initiativtakar for nattkafe for ungdomsskulen. Dette er eit godt brukt tilbod. Ein anna møteplass ho har er barnekor for dei yngre.
– Viktig å gjere ein forskjell
Då Fjordenes Tidende tok kontakt med Nanda Maack vart ho svært overraska.
– Eg vart heilt sett ut og rørt, seier Nanda, som etter å ha summa seg tar imot julestjerna med stor glede og takksemd.
– Kva er det som gjer at du engasjerer deg så mykje i lokalsamfunnet ditt?
– Eg har nok vakse opp med ei haldning om at ein skal engasjere seg for ting som er viktig. Og så er eg ganske impulsiv og handlar ut frå kjensler.
Belinda har mellom anna trekt fram Nanda sitt engasjement i bassengsaka.
– Bassengsaka går inn på meg. Eg meiner det er viktig å prøve å gjere ein forskjell for andre og samstundes jobbe for at barna våre får gode og trygge oppvekstvilkår, seier Nanda.
Anne er glad i bygda si og får julestjerne for innsatsen ho legg ned: – Nei, gurimalla kor kjekt!
Mange kvardagsheltar
Samstundes er ho tydeleg på at ho ikkje handlar på eiga hand.
– Eg spør alltid familie, venner og kjenningar kva dei meiner. Eg kjenner også på stemninga på kva vi som lokalsamfunn meiner. Det er dei, mannen min og barna mine som gir meg tryggleik og støtte slik at eg kan engasjere meg i stort og smått.
Ho peiker på at det finst mange som gjer mykje rundt omkring i bygdene våre.
– Det er mange kvardagsheltar der ute som jobbar i det skjulte.
Nanda har også mykje fint å seie om Belinda som nominerte henne.
– Ho er ein god støttespelar og venn. Vi arbeider på kommunehuset begge to, og vi har mange gode samtalar, smiler Nanda.